رئيس التحرير: عادل صبري 04:54 مساءً | الاثنين 20 أغسطس 2018 م | 08 ذو الحجة 1439 هـ | الـقـاهـره 37° صافية صافية

بالفيديو..أسماء .. قصيدة جديدة لـ "طلبة" عن أسماء البلتاجي

بالفيديو..أسماء .. قصيدة جديدة لـ طلبة عن أسماء البلتاجي

فن وثقافة

محمد طلبة رضوان

بالفيديو..أسماء .. قصيدة جديدة لـ "طلبة" عن أسماء البلتاجي

محمد طلبة رضوان 14 أغسطس 2014 13:28

فيه حاجة في الطيبين
المخلصين الأمرا ..


فيه حاجة في النيل .. في بيتنا
في كل بنت ف شبرا
فيه حاجة في الله وصوته
وفي التجلي العظيم
وفي الهتاف
وسكوته
والدعوة ع الظالمين
فيه حاجة من ضلع آدم
كان اسمها "حواء"
فيه فكرة في الضل نورها
غشى على الأضواء

بنت اسمها "أسماء"

البنت
زي الحكاية
زي الميدان
والحق
زي السند في الرواية
وزي قولة "لأ"

البنت زي القدر
زي القمر والنصيب
زي الأمان م الخطر
زي الشروق والمغيب
زي ابتسامة مطر
ما بين حبيب وحبيب

كانت بتحلم ..
 وصحيت ع الموت جزاء الحلم
ضربوا الرصاص ع الناس .. وقالوا موتهم فيلم
وجابوا من كل جحر.. أوسخ ما فيه من ضِباب
يقولوا عنهم كلام أنضف ما فيه السباب

لو كنت من أهل الميدان
لازم هتعرفها
خبطت في كتفك مرة أو مرة عدت قصادك
وشوش كتيرة أصيلة .. ومفيش ما بينهم حدود
كانت معانا في يناير .. كسرت معانا الحدود
وخطاها سبقت خطانا أيام "محمد محمود"
في صوتها قوة وحماس
ف عيونها رقة ووداعة
كانت ضمير الميدان
مش بنت حزب وجماعة


أسماء حكاية طويلة
بكرة يقولوها الناس
عن بنت حرة وجميلة
ماتت بإيد حراس
دولة جبانة وذليلة
في إيد عسس أنجاس

أسماء .. وما أدراك
شباك على الجنة
قلبك في حضن سماك
وعروسة في الحنة

أسماء .. كلام النبي عن الجيران والود
أسماء مزاج الصبي .. نور فرحته ع الخد
أسماء إيمان الناس بإن ليهم رب
ماتت في حضن الرصاصة .. حتى الرصاص بيحب.

في صحبة رايحة الميدان
لازم تشوف أسماء
في الطبطبة بحنان
هتلقى إيد أسماء
بــَرد الصفا في القلوب
جاي من دفا أسماء
معنى الأمان في الخطوب
فكرة في بال أسماء
وفي القصيدة الجنان دايب صبابة وشجن
ومع النبي ع الحوض بتناوله شربة ماء
بنت اسمها أسماء ..  


شفت في لسانها الشهادة
زي الخشوع في العبادة
زي اللي رايحة وعارفة
إن الكرامة إرادة ..

البنت دي مننا
ولسه ساكنة هنا
فيه حاجة فينا عنيدة
ورافضة أصل الداء
حاجة اسمها أسماء

أسماء بتشبه لنا
لما الملامح تبان
تشبه لغربة وضنا
رايحة على العنوان
وذكريات عن عراق وعن الخليل والبوسنة
وبنت شايلة في جروحها
أسماء الله الحسنى
أسماء دي بنتي أنا
وما اسمهاش أسماء
أسماء حكايتي أنا
وإسمها أسماء
أسماء حكايتك واسمك .. أنت كمان أسماء
أسماء مرايتك ورسمك .. حلمك صور أسماء

موجودة، .. مش موجودة .. ؟
معنى الوجود أسماء ..

ذات النطاق/ الصبر
ذات النطاق/ الغضب
الدنيا مش بالجبر
وفيها علة وسبب
الدنيا ثورة ودين
ودين وله ثورة
كذبوا اللي قالوا آمين
ورا الطغاة الضالين
وقلبوا وحي الإله .. لتجارة ومناورة
كذبوا وهما الداء
كفروا بدين أسماء ..

ربك نصفها بشهادة ...
واحنا اختبرنا بحضورنا
القيمة مش في العبادة
القيمة باللي في صدورنا
والبنت سبقت وضحت .. وقت المروءة ما شحت، راحوا اللي صدقوا في عهودهم ..
وجه أوان دورنا.

في الخلق ناس لو يشاءوا ربك عشانهم يشاء
وعشان كده الثورة جايه ..
جايه عشان أسماء ...


للتواصل مع الكاتب:

تويتر
فيس بوك
 

  • تعليقات فيسبوك
  • اعلان