رئيس التحرير: عادل صبري 02:31 صباحاً | الثلاثاء 13 نوفمبر 2018 م | 04 ربيع الأول 1440 هـ | الـقـاهـره 26° صافية صافية

عشان خاطر سعيد صالح .. قصيدة جديدة لـ "طلبة"

عشان خاطر سعيد صالح .. قصيدة جديدة لـ طلبة

فن وثقافة

الشاعر محمد طلبة رضوان

عشان خاطر سعيد صالح .. قصيدة جديدة لـ "طلبة"

محمد طلبة رضوان 02 أغسطس 2014 11:47

يا عم سعيد يا طيب زي عود نعناع

وداع صافي بطعم معاد
لا يتأجل ولا ينباع
مفيش ف الغربة حد ما راحش
مفيش في الغربة حد مجاش
لكن في الغربة ناس ضاعت
وناس قضت حياتها بلاش
وناس رغم الأسى بهجة
وناس رغم الحصار لهجة
وناس يسجنها ألف براح
وناس يخشاها ألف ضياع

يا عم سعيد على مهلك
وسلم ع اللي فات قبلك
سلام مخصوص ليونس شلبي
من قلبك .. 
سلام لأحمد زكي مني
ولو تقدر تطمني
على وردة ولحن بليغ
ولو فايت سلام تاني على مرسي جميل عزيز
ولو ممكن سلام ما تقولش مين صاحبه لفؤاد حداد
ولو قادر وتخدمني تسلملي على شكوكو
وقل له إني باكتب له .. وبحلم يوم يغني لي
وقل له "طلبة" بيقولك: يا إما أجيله يا يجيلي
ونسهر سهرة صباحي
ونكتب حاجة عنابي
وسلم ع اللي تاه مني في قلب الزحمة على بابي
وكان بيني وبينه معاد
وكنت كاتب له أغنية يلحنها وأغنيها .. بادور فجأة مالقيتهوش
منير مراد .. وقل له "طلبة" بيقولك تملي في قلبي يا حبيبي
سلام نادي شفيف وخفيف
سلام أبيض كما الصحبة لعم الناس وموالهم
وتاج راسي واحساسي حبيبي محمود الشريف
وأقولك إيه يا عم سعيد
ما هي السلامات بلا آخر
وهي الدنيا سابت حد بنحبه ما أخدهوش
يادوب دور شاي وتعميرة
وقبل ما يضجع في القعدة يتاخر
وما تلاقيهوش ..
أقولك روح يا عم سعيد .. على البركة
أقولك: لأ
أقولك: طب هقول استنى
سلم على عبعظيم عبحق
وقل له الناس هتتغير
وقل له الثورة هتغير
وقل له بكرة مستنيك.. ميلاده يوم ميلادك جاي
وقول للحاضرين في غياب
ما غابشي اللي بفنه حي
وقول للضي
محمد طلبة بيمسي
ما تيجي شوية نتعرف
وناخد كاس
ونشرب مرة على إيدك
ونعزم يومها كل الناس
وأهي مرة .. ما تستناش 
عشان خاطر سعيد صالح .. 
قل له بس وهييجي .. 
سلام

 

للتواصل مع الكاتب:

على تويتر:

https://twitter.com/Tolba_Radwan

على فيس بوك:

https://www.facebook.com/mohamed.t.radwan

 

إقرأ أيضًا:

 

  • تعليقات فيسبوك
  • اعلان