رئيس التحرير: عادل صبري 06:13 صباحاً | الاثنين 24 سبتمبر 2018 م | 13 محرم 1440 هـ | الـقـاهـره 34° صافية صافية

الحق بطّل يبتسم.. قصيدة جديدة لـ محمد طلبة رضوان

الحق بطّل يبتسم.. قصيدة جديدة لـ محمد طلبة رضوان

فن وثقافة

الشاعر محمد طلبة رضوان

الحق بطّل يبتسم.. قصيدة جديدة لـ محمد طلبة رضوان

13 يوليو 2014 12:52

الحق بطل يبتسم لصحابه..

بطل يشاور للعيال الملفوحين

على كتف أبوهم وأمهم

بطل يحب الأسئلة

والفرحة في عيون الفقير

برغيف حلال

الحق بقى زاهد في تفسير الآيات

عاجز

ومتردد

وقلقان م الثبات

الحق مش فاكر تاريخه

كأنه مهزوم م البداية

الحق هربان من طريقه

وطريقه هيمان بالغواية

الحق مش قادر يميز

بين ملامحه وبين مصيره

والصورة مش واضحة في مرايته

هي صورته،

هي غيره؟

الحق متحاش

في البراح

زي السما..!

زي النسيم ما بيسبق النار والهجير

زي السكوت المر بعد كلام كتير

زي الندا

ساعة الخطر مبحوح

زي الرضا

ساعة خروج الروح

زي الصدى

لما الونس بيروح

زي اللي ماله زي

ميت في حلق الحي

ماضي ووقته الجاي

ومحاجي ع المسافات

مرفوض

من المجاذيب

مخضوض من المحاسيب

مكتوب على المضطر

مفروض على الأموات

 

للتواصل مع الكاتب:

على تويتر:

https://twitter.com/Tolba_Radwan

على فيس بوك:

https://www.facebook.com/mohamed.t.radwan

 

اقرأ أيضًا:

  • تعليقات فيسبوك
  • اعلان