رئيس التحرير: عادل صبري 11:52 صباحاً | الجمعة 21 سبتمبر 2018 م | 10 محرم 1440 هـ | الـقـاهـره 34° صافية صافية

ما تصدقوش خيري ولميس وأديب.. قصيدة جديدة لسعيد شحاتة

ما تصدقوش خيري ولميس وأديب.. قصيدة جديدة لسعيد شحاتة

فن وثقافة

الشاعر سعيد شحاته

ما تصدقوش خيري ولميس وأديب.. قصيدة جديدة لسعيد شحاتة

27 أبريل 2014 12:43

 

ما تصدقوش خيري ولاميس وأديب
من مرتضى لسوزي لفريد الديب
الثورة قامت والبطـــــــــون عامت
الثورة نامت دقدقـــــــــوا القباقيب

ياللي اغتصبتوا القمر
 لسّه القمر صامد
واقف وحيد في المدى
 وقلبه الضعيف جامد
عمّد عيال السما
 وعمّدنا واتعامد
علشان يشوف الغلابة
 ويفضح المراكيب

يا مشخصنين الوطن
 ما تشخصنوش الروح
ولا تعملوا فلان إمام
 ولا تعملوا فلان نوح
لو عديتوها بسلام
 فسلام على السالم
وان جبتوا ظالم... أكيد
لسّه الميدان مفتوح

ما تصدقوش الغبي الهلاس ذليل الناس
إعلام سما وسمسمة
وهيفا وحكيم وإيناس
يا مصر من امتى فيكي الجهل صار قارب
يا مصر من امتى فيكي الحرّ كان هلاس
.... وازاي يقولوا النديم ابن الأصول كنّاس
...وازاي عرابي البطل عملوه غبي ورقّاص
....وازاي يضيفوا البارودي لقايمة الأنجاس
يا مصر من امتى فيكي الجهل صــار قارب
والنيل موارب وشــــارب للكيعان محاسيب

ما تصدقوش خيري ولاميس واديب
والشخصنة المُحْصنة المفطومة ع التخريب
لسّه الوطن مرسوم على صدورنا
........ إحنا اللي متنا بننتظر دورنا
لفينا وسط الحطب وف حضرتك دورنا
يا دورنا دفّي العيال واتونسي بدورنا
الليل هجم ع الميدان ملّس على بدورنا
نوّر بنورنا ورفض يركع مع الدباديب

ما تصدقوش خيري واديب ولاميس
م الرقاصين للدون لحادي العيس
الثورة قامت حــــــــــــرّكت أبدان
الثورة نامت حــــــــرّكوا المتاريس

 

  • تعليقات فيسبوك
  • اعلان