رئيس التحرير: عادل صبري 12:50 صباحاً | الجمعة 19 أكتوبر 2018 م | 08 صفر 1440 هـ | الـقـاهـره 28° صافية صافية

الشاعر أحمد عبيد يرثي بيرم التونسي

الشاعر أحمد عبيد يرثي بيرم التونسي

فن وثقافة

أحمد عبيد

الشاعر أحمد عبيد يرثي بيرم التونسي

05 يناير 2014 15:56

يا عم بيرم..

 يا معلم

يا أبو الأزجـال

ضربت "موليير" على عينه

حق ويتقال

لو بس تسمح تجاوبني

لك عندي سؤال

سيبت لنا إيه بس يا بيرم نتكلم فيه ؟!

 

لو ف السياسة بتتكلم فشر الساسة

وتصحّي ف الخلق النايمة بكل حماسة

لو تلتقي راية العربي ف يوم منداسة

زجلك يهز البيت الابيض ويا الإليزيه

سيبت لنا إيه بس يا بيرم نتكلم فيه ؟!

 

وف المراثي بتتكلم فشر الخنســــــــاء

رثيت صحابك وحبايبك بزجل حرّاق

قولك ف "سيد" وف "شوقي" مليان أشواق

كلام يدوب صخر جبال وكمان يبكيه

سيبت لنا إيه بس يا بيرم نتكلم فيه ؟!

 

لك صنعة ف الكلمة عجيبة

صنعة فنان

الكلمة منك تتغنى ومن غير ألحان

يا اللي ابتدعت على مزاجك أجمل أوزان

عملت نهج لتلاميذك علشان تحاكيه

سيبت لنا إيه بس يا بيرم نتكلم فيه ؟!

 

ولما توصف على وصفك مين كان يقدر ؟

وصف الحريم المتبرقع والمتغندر

وأم المشرشر ومشجر والمتجرجر

وأم المقصّب ومطرّز داير ستانيه

سيبت لنا إيه بس يا بيرم نتكلم فيه؟؟

 

وشيوخ كباب طرب وكفته.. كانوم أندال

ومسّاحين جوخ لاسيادهم علشان المال

يبيع أبوه ويبيع دينه

على نص ريال

زجلك هراه خلاه يقفل باب بيته عليه

سيبت لنا إيه بس يا بيرم نتكلم فيه ؟!

 

سلّم لسانك يا معلم فن اللهجات

شوام وبدو على مغاربة

حتى الخواجات

وخفت ع الشرق المسلم ف الذل يبات

لقيته فيه "جو منوّر"

وعقول معاتيه

سيبت لنا إيه بس يا بيرم نتكلم فيه ؟!

 

فلاحنا كان شغال يومه بإيديه ورجليه

القطن قطنه ومن تمنه ما يطولش جنيه

والمال يروح على جيب "حشمت" أخو "شوكت" بيه

ما يلقى حد سواك واقف يلعن معاليه

سيبت لنا إيه بس يا بيرم نتكلم فيه ؟!

 

مين بعدك استجرى وقلّد فن الموال ؟؟

وسلطن الجو العالي بكلام م العال ؟

وع الربابة يرسينا على بؤس الحال

والآه بتطلع ع الأرغول تبكينا عليه

سيبت لنا إيه بس يا بيرم نتكلم فيه ؟!

 

الراديو مشتاق من بعدك يسمع فوازير

والمصري – ما انت عارف طبعه – يهوى التحزير

سايب فراغ والله يا بيرم

دا الفرق كبير

وان حد قال "طب ما انا زيّه"

ممكن نقاضيه

سيبت لنا إيه بس يا بيرم نتكلم فيه ؟!

 

مين اللي قبلك قام ينصح جنس النسوان؟

ويقول بلاش شبّة وعكنة وحلتيت ولبان؟

والكودية روخرة بلاش منها

دي من الشيطان

لكن ومين كان يسمع لك؟؟

نسوان معاتيه

سيبت لنا إيه بس يا بيرم نتكلم فيه ؟!

 

قبل الأوان قلت النسوان يلزمها تمد

وتبقى حرة وتتعلم تحسب وتعد

لجل البلد دي يروق حالها والعود يتشد

الست تبقى دراع جوزها

إيدها على إيديه

سيبت لنا إيه بس يا بيرم نتكلم فيه ؟!

 

مين اللي قبلك قام طالب بقانون يتسن

يصون حقوق كل مؤلف بين أهل الفن

كان المؤلف متمرمط مش لاقي البن

يمضي التنازل للمحاسيب لجل تعشيه

سيبت لنا إيه بس يا بيرم نتكلم فيه ؟!

 

اسمع كلامك ف المغنى

أعجب واحتار

حقك يا صاحب الشيخ سيد وملوك الكار

عايش ما بين " كرد" و"سيكا" ليل ويا نهار

زي اللي مفطوم ع المغنى متربي عليه

سيبت لنا إيه بس يا بيرم نتكلم فيه ؟!

 

شمس الأصيل بسألها عليك لما اشتاق لك

تقوللي اسأل ثومة عليه

هي تدلّك

يا اللي بذكائك كل الناس غنت فنك

تعال شوف أغانينا اليوم

رب ما توريه

سيبت لنا إيه بس يا بيرم نتكلم فيه ؟!

 

قاعد وكل الناس حواليك رايحة وجاية

من سيدي بشر لأبو العباس للمنشية

وم الحسين ومن الأزهر للحسنية

كل اللي كان ف قلوب الناس قلت لنا عليه

سيبت لنا إيه بس يا بيرم نتكلم فيه ؟!

 

ما كانش بيهمك ظالم مهمن نفخوه

فؤاد فاروق ما يهمكشي

تلعن بو أبوه

فضحت أسلاف أجدادهم

قاموا قالوا انفوه

لبلاده أو حتى فرنسا

على مونبلييه

سيبت لنا إيه بس يا بيرم نتكلم فيه ؟!

 

واللهِ وما لكش على يا بيرم حلفان

صعبان على ما اكملشي وما اقولشي كمان

دا لسه يا ما كلام عنك محتاج أزمان

واجيب منين أوراق تكفي

قولي اعمل إيه؟

سيبت لنا إيه بس يا بيرم نتكلم فيه ؟!

 

أقولك إيه بس يا بيرم مش لاقي كلام

مش ح أوفي حقك يا معلم لو أقول ميت عام

وان قلت وفّيتك حقك دي تكون أوهام

دول كلمتين من معجب بيك لو تسمح ليه

سيبت لنا إيه بس يا بيرم نتكلم فيه ؟!

 

الفاتحة ليك أنت وقلمك

رحمة وأنوار

لا ف يوم جاملت ولا ف عمرك جرفك تيار

ومت وف إيدك قلمك

موتة أحرار

سبت لنا فنك يتدرس.. ونشوفك فيه

سيبت لنا إيه بس يا بيرم نتكلم فيه ؟!

 

  • تعليقات فيسبوك
  • اعلان