رئيس التحرير: عادل صبري 09:02 مساءً | السبت 22 سبتمبر 2018 م | 11 محرم 1440 هـ | الـقـاهـره 34° صافية صافية

على اسم مصر.. قصيدة جديدة لـ"عمر طاهر"

على اسم مصر.. قصيدة جديدة لـعمر طاهر

فن وثقافة

عمر طاهر

على اسم مصر.. قصيدة جديدة لـ"عمر طاهر"

30 ديسمبر 2013 19:27

على اسم مصر يا ليلى يا عين

ع الاسم ده قالوا الحلوين

وانا نفسى مرة اقول من نفسى

بالإذن خمسه يا عم جاهين

على اسم مصر نزلت السوق

الحظ يعلى ف يوم ويسوء

وان كانت الايام دى تقيله

مسيرها بكرة يا مصر تروق

على اسم مصر بابيع الفل

وانا وحدى بس باقول للكل

صلوا على المختار تضبط

صلاة النبى دى بتعمل شغل

على اسم مصر باطفى النار

يعلوا وانا اهد الاسوار

وحشتنى ضحكة كل الناس

حتى مذيعة الاخبار

على اسم مصر عملت حجاب

علشان مانرجع سوا أحباب

بالحب نغلب أيامنا

على رأى سومه الهوى غلاب

على اسم مصر باعلى بيوت

وتعيش بيوتها مهما نموت

سادة شربتها واهى راجعه

مضبوطه قهوتى بالمضبوط

على اسم مصر الدعا شغال

ده انا حتى قلبى ماعدش شمال

على اسم مصر بعت سلام

سلام عليكى يا أرض الشام

مسيرها تحلو الأيام

على اسم مصر

  • تعليقات فيسبوك
  • اعلان