رئيس التحرير: عادل صبري 08:20 مساءً | الجمعة 19 أكتوبر 2018 م | 08 صفر 1440 هـ | الـقـاهـره 28° صافية صافية

أشهر قفشات "مزجانجي" السينما محمود عبد العزيز

أشهر قفشات مزجانجي السينما محمود عبد العزيز

فن وثقافة

الفنان محمود عبد العزيز‎

أشهر قفشات "مزجانجي" السينما محمود عبد العزيز

آية فتحي 13 نوفمبر 2016 13:58

"لازم ندوش الدوشة بدوشة أدوش من دوشتها عشان ماتدوشناش” حُفرت تلك الجملة وغيرها في أذهان الكثير من متابعي السينما وبالأخص محبي الفنان الراحل محمود عبد العزيز، الذي تنقل بإبداعه بين الشخصيات الشهيرة التي قدمها، سواء شخصية الشيخ حسني، المعلم عبد الملك زرزور، المزاجنجي، أو أبو هيبة، وللساحر محمود عبد العزيز العديد من الجمل الحوارية والقفشات التي حفظها عنه الجمهور.


 

الشيخ حسني:-

لشخصية الشيخ حسني التي قدمها الفنان محمود عبد العزيز في فيلم “الكيت كات”، العديد من الجمل الحوارية منها:-
 

-الحكايه مش حكاية البيت ياعم مجاهد، المشكلة مشكلة الناس اللى عايشه و لازم تعيش متظلمنيش يا عم مجاهد، لا مؤاخذه يعنى مغرفة الفول اللى كانت بمليم، بقت بنص ريال، سلام عليكم سامحنى يا عم مجاهد.
 

- الحشيش ده هو الذنب الوحيد اللى فى حياتى بعد ما ماتت أم يوسف، مكانش عندي حتى بنى ادم اكلمه انا بكلم الناس حوالين الجوزه , بفضفض بضحك وأغنى في قعده حلوه لغايه ما أموت.
 

-وإن مكانش صحيح البصر اللي زيي، يساعد الكفيف اللي زيك، يبقا على الدنيا السلام.


 

الكيف "مزجانجي ":-

من أكثر الأفلام التي قدم خلالها الفنان محمود عبد العزيز قفشات غريبة وجديدة على السينما فيلم الكيف، ومن أشهر قفشاته بالفيلم:-
 

- عصر الشهادات والوظائف انتهى مبقاش يأكل عيش.. احنا فى عصر تفتيح المخ.
 

- إحنا بالصلاة عالنبى حلوين قوي مع بعض، لكن ساعة الغلط بنطرطش زلط، يعنى لحمنا جملى مكندز مانتكالش، وإن إتكالنا عضمنا ركب مانتقرش، وإن إتقرشنا نشرخ في الزور وماننبلعش ، ولو بلعتني، هتلاقينى مر علقم وهتطرشني.

-لو الحشيش حلال أدينا بنشربوه ولو حرام أدينا بنحرقوه.

- لازم ندوش الدوشة بدوشة أدوش من دوشتها عشان ماتدوشناش.

- ياصبر صبصب قلوب الصبايا المتصابين، وصوب صبابك على الصبايا المصبصبين، يا صابر الصبر صبرنا بصبر المتصبرين.

- إحنا اللى خلينا الشكرمون طاخ فى الترالوللى.

 

 

أبو هيبة "جبل الحلال":-

ولشخصية أبو هيبة جمل حوارية شهيرة منها:-

- اللى يحس الموت ويصاحبه بتتغير حياته، وبعدين إحنا بنخاف من الموت ليه وكلنا موتنا كذا مره .
_إزاى ؟
_وأنت شاب بيموت الطفل وأنت شايب وعجوز بيموت الشاب
كلنا موتنا كذا مره وكل مره بنبكى ،لكن مفيش أغلى من الحياة أول ما تفتح عينك الصبح لازم تشكر ربنا وتسلم على الشمس وتسلم على الأكل وتسلم على الزرع تسلم على قميصك اللى أنت لابسه.

-حد يخاف من الموت حد يخاف من خواف؟ للموت أنفاس خفيفة زي النسمة مايحسهاش إلا المقصود".


 

المعلم عبد الملك زرزور:-

ومن أحدث الشخصيات التي قدمها عبد العزيز كانت شخصية المعلم عبد الملك زرزور بفيلم "إبراهيم الأبيض"، ومن أشهر قفشات تلك الشخصية:-

-الجرأة حلوه مفيش كلام

-أهون عليك تهون عليا.

-الإنسان ضعيف.

– حد لوه شوق في حاجة.

 

يذكر أنه تُوفي مساء أمس السبت الموافق 12 نوفمبر 2016 الفنان محمود عبد العزيز عن عمر ناهز الـ 70 عاما بعد صراع مع المرض.
 

وتعرض الفنان محمود عبد العزيز الشهر الماضي لأنيميا شديدة أدت لحدوث خلل في الدورة الدموية شديدة ونقل على إثرها إلى المستشفى.

  • تعليقات فيسبوك
  • اعلان