رئيس التحرير: عادل صبري 03:19 صباحاً | الجمعة 16 نوفمبر 2018 م | 07 ربيع الأول 1440 هـ | الـقـاهـره 26° صافية صافية

زوجة قيادي بـ6 إبريل تروي واقعة القبض عليه

زوجة قيادي بـ6 إبريل تروي واقعة القبض عليه

سوشيال ميديا

أيمن عبد المجيد

زوجة قيادي بـ6 إبريل تروي واقعة القبض عليه

03 يناير 2016 19:27

ذكرت ضحى حازم زوجة أيمن عبد المجيد القيادي بحركة شباب 6 إبريل، تفاصيل إلقاء القبض على زوجها في نهاية ديسمبر الماضي.

 


وكتبت ضحى في منشور مطول عبر صفحتها الشخصية بموقع التواصل الاجتماعي "فيس بوك" عن حالة الرعب التي أصابتها وابنتها عند إلقاء القبض على زوجها من المنزل ليلًا.
 

"أنا ضحي مرات أيمن عبد المجيد اجدع زوج ممكن اي واحده تحلم بيه ، واحد يشجع مراته تتعلم كمانجه وًهيا عندها ٣٥ سنه... و لا يقولها كمانجه ايه في السن ده ادخلى اعملي حله محشى أحسن يا شيخه ، واحد يحجز سفريه مفاجاه لمراته في عيد جوازهم و يوضب لها الشنطة و يظبط اجازه مع شغلها و يخدها عالمطار و يقولها هنجيب حد من هنا لمجرد أني كان نفسي أسافر الحته ديه ، أحسن أب فالدنيا و احن ابن و ارجل اخ. بني نفسه بنفسه من غير وساطه لحد ما وصل لأعلي الدرجات في شغله، محبوب من كل الناس الي اتعاملوا معاه.. ايوه حاجه خيال كده... و هوه دا أيمن عبد المجيد".


وتابعت: "يوم الاثنين ٢٨ ديسمبر الساعة ١:٣٠ الصبح جرس بيتنا رِن مش جرس الانتركم ...يعني أكيد ده البواب بيقول اننا نسينا نور العربيه مثلا ، رديت من ورا الباب و بعد ما اتاكدت انو البواب فتحت الباب حته و طليت براسي بس لقيت البواب معاه عشر رجاله او اكثر لابسين مدني، قالوا عايزين أيمن عبد المجيد ..سألتهم انتو مين ردوا أنهم أمن وطني.. قلت لهم ثانيه واحده و باقفل الباب عشان لابسه بيجامه و اجيب أيمن ..زق واحد فيهم الباب بايده و رجله..اتخضيت وزعقت. . أيمن جري عالباب يشوف فيه آيه و دخلهم ، طلبوا اللاب توب بتاعه و كان اللاب توب بتاعي أنا موجود فاتحاه. .. حاولت افهمه انو دا بتاعي أنا ..و هو مصر يبص عليه..فضلت أقول له لو سمحت ده بتاع شغلي و ورتلوا شعار شركتي عليه و ان مش هينفع يحاول يفتحو من غير باسورد لحد ما سابني افتحو و أتأكد انوا بتاعي و شاف فيس بوك بتاعي و بيحاول يشوفوا قولتلو دا بتاعي واخدتوا منه. .. اخدوا لاب توب أيمن و موبيلاتوا الاثنين . و دخلوا اوضه نومنا عايزين يفتشوا سألته تاني فين إذن التفتيش مردتش قولتلوا لو سمحت ديه أوضتي و فيها لبسي اللي ميصحش تشوفوه... رد عليا أنا معايا إذن أفتش البيت كله و برضه ماضهرش إذن نيابة.. فتح دولابي و لبسى و حاجتي و كل ده و بنتي جوه خايفه و فاكراهم حراميه.. قاعدة مذعورة في مكانها ... لحد ما طلبوا يخدوه ...دخل واحد مع ايمن الاوضه عشان يغير هدومه و نزلت معاه عشان عارفه إن ممكن أوي يختفي زي عشرات غيره ، وخدونا قسم النزهه..وهناك خدوه جوه وانا بت قدام القسم..ورحلوه تاني يوم لقسم الدقي اللي اتحقق معاه فيه وخد 15 يوم سجن تلفيق وظلم ".
 

وواصلت: "أنا من ساعتها وًانا بحاول اتلم على أعصابى عشان أُوصِّف الرعب و البهدله الي حصلت بس مش عارفه و مش لاحقه من مشاوير السجن للنيابه . ساعات بتمني ابات ادام السجن عشان أكون قريبه منه بس حاته ديه مش نافعه نفسي أغمض عيني و اصحيً من الكابوس البشع ده !!!يا رب فك أسره هوه و كل المعتقلين، إنت مش لازم تكون ثوري ولا اي حاجه عشان تحس ان ده ظلم و حرقه قلب عليه من أهله و أطفاله و صحابه و كل واحد عرف أيمن ، أنت بس محتاج تكون بني آدم ...أيمن ماعملش أي حاجه عشان كل الإرهاب والبهدله دى..انا لحد دولوقتي بترعش من صوت جرس الباب ...فمش عارفة ممكن تكون بنتي حاسه بأيه !!!".





وكانت حركة شباب 6 إبريل قد أعلنت القبض على عدد من أعضائها بتهمة الانضمام إلى جماعة إرهابية، والتحريض على التظاهر.

اقرأ أيضًا:

  • تعليقات فيسبوك
  • اعلان