رئيس التحرير: عادل صبري 05:00 صباحاً | الأربعاء 12 ديسمبر 2018 م | 03 ربيع الثاني 1440 هـ | الـقـاهـره 22° غائم جزئياً غائم جزئياً

وائل غنيم يروي تفاصيل تعرفه على أحمد ماهر

وائل غنيم يروي تفاصيل تعرفه على أحمد ماهر

سوشيال ميديا

وائل غنيم

وائل غنيم يروي تفاصيل تعرفه على أحمد ماهر

مصطفى المغربي 27 أكتوبر 2015 08:15

روى الناشط السياسي وائل غنيم تفاصيل تعرفه على أحمد ماهر مؤسس حركة 6 إبريل.

 

وقال في تدوينة عبر حسابه الرسمي على موقع التواصل الاجتماعي "فيس بوك": "عن ناشط السبوبة أحمد ماهر، 2008 أول مرة أسمع اسمه بسبب صورة شفتها على فيسبوك لواحد ضهره مليان سحجات من التعذيب".

 

وأضاف: "عرفت إن أمن الدولة خطفوا أحمد بدون إذن نيابة ولا حكم قضائي، اتعذب أثناء التحقيق معاه في أمن الدولة وتم تهديده بإنه لازم يبطل اللي بيعمله وإلا هتبقى العواقب وخيمة، والسبب؟ إنه حاول مع مجموعة لتنظيم دعوات عامة للإضراب في 2008 لمعارضة نظام مبارك".

 

وتابع: "وقتها سألت نفسي: هو ليه شاب زي ده يعرض نفسه للخطر؟ غالبًا أحمد ده مجنون".

 

وواصل: “2010، وبعد كذا أسبوع من إنشاء صفحة "كلنا خالد سعيد"، بعت رسالة لأحمد ماهر من إيميل أدمن الصفحة، قلتله فيها عايزين ننسق بين الصفحة وحركة 6 أبريل على شرط إنه ميحاولش يعرف شخصيتي فكان رده باحترام رغبتي".

 

وذكر: "كنا بنتكلم مع بعض عن طريق Gmail Chat لفترات طويلة جدًا، وبنحاول ننسق المواقف ودعوات الحراك السياسي، علاقتنا -وإن كانت افتراضية- سمحت بجانب من المعرفة الإنسانية اللي خلت لأحمد عندي معزّة خاصة جدًا".

 

وأردف: “2011، قبل اندلاع الثورة بأسبوع، اتقابلنا بالصدفة في ندوة عن الإنترنت وكنت حاضرها بصفتي مسؤول في جوجل الشرق الأوسط، فسألته بطريقة متشككة عشان أشوف رد فعله (من غير ما كان يعرف إني أدمن صفحة كلنا خالد سعيد): تفتكر يا أحمد هيحصل فعلاً ثورة كمان كام يوم؟".

 

واستطرد: "قال لي.. إن شاء الله مبارك هيسقط، أنا عمري ما شفت الشباب متحمس بالشكل ده، وصفحة كلنا خالد سعيد على فيسبوك هتعلن أماكن التظاهر كمان كام يوم، فابقى تابع الصفحة عشان تعرف التفاصيل وتنزل تشارك، معانا، فقلتله حاضر هاتابعها إن شاء الله".

 

وروى: "بعد ما خرجت من المعتقل، اتصلت بيه تاني يوم، فقال لي وهو بيضحك: "يا بن الـ #$@٪!، قعدت تكلمني شهور من غير ما تقول لي انت مين؟ وبعدين تقابلني وتعمل نفسك مش عارف حاجة وتشتغلني، لما أشوفك".

 

وأوضح: "أحمد ماهر من أكتر الشباب اللي اتشوه في الإعلام لأنه كان بيمثل حركة 6 إبريل، اتهموه بإنه عميل وممول، وطلعت مئات الشائعات عليه من شخصيات إعلامية بعضها بيتقاضى الملايين لبث سمومه في وسائل الإعلام لغسيل دماغ الناس وإقناعهم بإن الحرية خطر والديمقراطية بدعة وإن حقوق الإنسان مؤامرة".

 

وواصل: "المضحك المبكي إن أحمد ماهر اللي معروف بلقب "العميل" و"الممول" و"ناشط السبوبة" كان ولازال عايش هو وأسرته الصغيرة حياة عادية جدًا، وشقته اللي اشتراها بالقسط على سنين طويلة تمنها لا يتجاوز مرتب شهر واحد لإعلامي من الإعلاميين اللي بيشوهوا فيه ليل نهار في التليفزيون ويقنعوا الشعب المصري إنه حاصل على تمويلات أجنبية".

 

وذكر: "أحمد ماهر زينا كلنا مش ملاك، كلنا وقعنا في أخطاء كتيرة أغلبها كان لسذاجتنا وحداثة عهدنا بالسياسة، أحمد ماهر عمره ما عمل حاجة شايف إنها ضد مصلحة بلده، وعمره ما سرق ونهب فلوس أهل البلد الغلابة، وعمره ما تاجر بشعارات أو سعى لمناصب ميستحقهاش أو مش أهل ليها".

 

واختتم: "لما هحكي لأولادي لما يكبروا عن مصر 2011، مش هانسى أحكيلهم عن الشاب المصري السكندري اللي وهو عنده 30 سنة انتفضت جهات سيادية ووسائل إعلامية وشخصيات سياسية عشان يحاربوه ويشوهوا سمعته، ويسجنوه، وإنه لسه متمسك بحلمه، ولسه متحمل فوق طاقته، أحمد وآلاف الشباب زيه هما الأمل، والأمل في مصر حاليا محبوس".

وأيدت محكمة النقض حبس كل من أحمد ماهر مؤسس حركة 6 أبريل، والمتحدث الإعلامى باسم الحركة، محمد عادل، والناشط السياسى أحمد دومة، على قرار محكمة جنح مستأنف عابدين، 3 سنوات، لاتهامهم بمخالفة قانون التظاهر.

 

اقرأ أيضًا:

  • تعليقات فيسبوك
  • اعلان