رئيس التحرير: عادل صبري 04:34 مساءً | الخميس 16 أغسطس 2018 م | 04 ذو الحجة 1439 هـ | الـقـاهـره 37° صافية صافية

مغردون يدعون لمقاطعة بنك CIB بسبب "مستشفى 25 يناير"

مغردون يدعون لمقاطعة بنك CIB بسبب مستشفى 25 يناير

سوشيال ميديا

بنك CIB - أرشيفية

مغردون يدعون لمقاطعة بنك CIB بسبب "مستشفى 25 يناير"

داليا السيد 14 أكتوبر 2015 15:41

دشن نشطاء على موقع التدوين المصغر "تويتر"، اليوم، هاشتاج جديدًا يدعو إلى مقاطعة البنك التجاري الدولي "CIB"، على خلفية أنباء تشير إلى رفض البنك فتح حساب لمستشفى 25 يناير الخيري.


وشارك كثير من المغردين عبر هشتاج "قاطعوا_بنك_CIB"، مما دفعه لاحتلال المركز الثالث ضمن قائمة تويتر للهشتاجات الاكثر تداولًا.

 

وهاجمت معظم التعليقات عبر الهاشتاج البنك، معتبرين أنه رفضه فتح حساب للمستشفى عدم اعتراف بثورة يناير.. 

 

وروى الكاتب الصحفي محمد الجارحي أسباب رفض بنك CIB فتح حساب لمشروع مستشفى 25 يناير الخيري.


وقال في تدوينة عبر صفحته على موقع التواصل الاجتماعي "فيس بوك": "لماذا رفض بنك CIB فتح حساب ل‏مستشفى25يناير‬؟، تخيلوا.. قيادات البنك التجاري الدولي CIB متضايقين من ٢٥ يناير".


وتابع: "حقهم وبراحتهم وحريتهم، كل واحد حر، لكن ما يكونش نتيجة ده إنك ترفض تفتح حساب باسم جمعية أهلية مشهرة في الشئون الاجتماعية علشان اسمها ٢٥ يناير".

 وأضاف: "١٠ شهور من المعاناة ووجع القلب مع البنك التجاري الدولي علشان نفتح حساب تبرعات لمشروع مستشفى ٢٥ يناير الخيري، والمحصلة في النهاية اخبط دماغك في الحيط".

 وواصل: "القصة بدأت في ديسمبر الماضي، تقدمنا بطلب ومحضر مجلس إدارة وخطاب من الشؤون الاجتماعية بالموافقة على فتح حساب للجمعية لدى البنك بفرع نادي الصيد بالدقي، تم إنجاز الورقيات والتوقيعات من رئيس مجلس الادارة وأمين الصندوق وكل الأوراق والمستندات التي طُلبت منا تم تقديمها".

 وروى: "بعد يومين اتصلت لمعرفة رقم الحساب، فكان الرد.. الحساب اترفض.. ليه يا فندم؟ معنديش أسباب.. إزاي يا فندم؟ أنا بأبلغ حضرتك اللي اتقالي.. طب اديني رد مكتوب؟؟ مفيش".

 وذكر: "اتصلت بصديق معرفة يعرف مسئول في البنك علشان يرسيني ع الدور، فقالي السبب اسم الجمعية.. قيادات البنك كلهم شايفين ٢٥ يناير مؤامرة وعلى حساباتهم الشخصية على فيس بوك بيكتبوا ده".

 وأردف: "اتعودت أحل المشكلة وأبذل قصارى جهدي ولا أيأس، وما أحبش أشتكي إلا إذا وصلت لطريق مسدود، عملت ده في موضوع التعلية وفي القصة دي".

 واستطرد: "المهم كلمت طوب الأرض لحد ما وصلت لهشام عز العرب رئيس البنك وبعت له إيميل حكيت فيه الحكاية، وكان رد الراجل لطيف واعتذر وأعطى أوامر بحل الموضوع".

 وأوضح: "وشرحت له إن الجمعية عندها حسابات في ٣ بنوك أخرى وترخيص جمع مال سار لمدة سنة وإننا بنبني مشروع، ثم جاء الرد الجهنمي من الأستاذ المكلف بحل الموضوع.. معلش أصل مفيش الجريدة الرسمية في الورق.. اتصلت وشرحت إن قرار الإشهار موجود ومفيش جمعية بتقدم جريدة رسمية في ورقياتها.. فقط قرار الإشهار ولائحة النظام الأساسي".

 وتابع: "بعد كام أسبوع قالت آه معلش أصل اللائحة مفيهاش إنك بتبني مستشفى.. قلتلها ووزارة التضامن اللي بتوافق على اللائحة دي كاتبة في موافقة رسمية للبنك إننا بنبني مستشفى".

 وروى: "بعد كام أسبوع جاءت حجة جديدة، أصل احنا بنراجع قواعد البنك الداخلية لفتح الحسابات للجمعيات الأهلية وده هياخد شوية وقت، قلت وهي اللوائح دي الموظفين ما كانوش عارفين إنها بتتراجع يوم ما قدمنا الورق؟".

 وواصل: "بعد كام شهر اتصلت، وكان الرد.. لِسَّه بنراجع اللوائح بتاعت البنك.. وبعت إيميل تاني لرئيس البنك وطبعًا مفيش رد.. المهم أدركت إن الموضوع كده دخل في العك وصدمني بعد شوية إن جمعيات ومؤسسات أخرى أعلنت عن حسابات بنفس البنك".

 وذكر: "بقيت مش فاهم ليه الناس دي بتعمل كده؟؟ وليه كرههم لاسم ٢٥ يناير يخليهم يتصرفوا كده؟؟ احنا بنبني مستشفى من خلال جمعية مشهرة عندها حسابات في أكبر بنوك مصر وكل حاجة على عينك يا تاجر".

 وتساءل: "هل مطلوب إن مجلس الإدارة يكون فيه رجل أعمال ولا حد من المشاهير ولا يجيلهم تليفون من مسئول كبير علشان الحساب يتفتح في البنك التجاري الدولي؟ ومين بيحمي الناس دي ويخليها تستخدم سلطتها في إنها تعمل كده؟".

 وأردف: "هو المفروض الواحد يعمل إيه علشان الناس دي تفهم إن اللي بيعملوه ده بيكرهنا في كل حاجة؟ وإن اللي بنعمله ده المفروض يساعدوا فيه مش يحبطونا ويقرفونا؟".

 واختتم: "هنكمل وهنبني في البلد دي طول ما فينا نفس.. واللي بنعمله هيفضل عايش لأجيال وأجيال.. أجيال هتعرف وقتها إن ٢٥ يناير دي أحسن حاجة حصلت في تاريخنا مهما كان كرهكم ليها".


اقرأ أيضًا:

  • تعليقات فيسبوك
  • اعلان