رئيس التحرير: عادل صبري 12:38 مساءً | الأحد 23 سبتمبر 2018 م | 12 محرم 1440 هـ | الـقـاهـره 34° صافية صافية

منى سيف: معنديش خيار تاني غير الإضراب عن الطعام

منى سيف: معنديش خيار تاني غير الإضراب عن الطعام

أحمد تايلور 05 سبتمبر 2014 08:57

أوضحت الناشطة السياسية منى سيف، ابنة الحقوقي الراحل أحمد سيف الإسلام، الأسباب التي دفعتها لاتخاذ قرار الإضراب عن الطعام، مؤكدة على رغبتها في مشاركة أشقاءها علاء عبدالفتاح وسناء سيف رحلتهم مع الإضراب عن الطعام.

وفي تدوينة لها عبر حسابها الشخصي على موقع التواصل الاجتماعي "فيس بوك" قالت: "أنا اخدت قرار الاضراب عن الطعام لأني محتاجة اعمل حاجة تشركني معاهم في رحلتهم، مضيفة: "محتاجة أختبر معاهم التعب الجسدي الايام الأولى, التحسن النسبي بعد تأقلم الجسم ... كل مرحلة و كل احساس،  محتاجة اعمل حاجة تحسسني اني قريبة من سناء و علاء رغم كم الأسوار و الأبواب و المسافات الفاصلة ما بينا".

وتابعت: "أنا ما باخدش القرارات بعد اما احسب تأثيرها "تكتيكيا" و سياسيا، من أول الثورة و قرارتي و افعالي حقيقي حاكمها املاءات القلب، ماعنديش فكرة اذا كان قرار الاضراب عن الطعام ده مجدي في الضغط على السلطة ولا لا, بس متأكدة ان ماعنديش اختيار غيره".

وأضافت قائلة: "الفترة اللي فاتت كانت فترة مكثفة بالمشاعر، عملية بابا, تحسنه المفاجئ، تدهوره بعدها بأيام، ارتفاع حرارته و ساعات من الكمادات، لحظات الصفا و الوعي و النكت ، متابعة الأجهزة و انت حاطط ايدك على قلبك من لحظة الفراق، رحلة طويلة بتفاصيل حب و تفاصيل وجع و فيض من الحزن"، مشيرة إلى أن "اخواتي اتحرموا من كل ده، اتحرموا من مرافقة بابا في رحلته الأخيرة، مش بس من اللحظات الحلوة و حضور وعيه و كلامه لينا و عننا, لكن حتى لحظات الحزن .. من استيعاب حقيقة غيابه".

وأكملت منى سيف: "سناء و علاء عرفوا خبر رحيل بابا من الراديو، تاني يوم لقوا نفسهم في مشهد زحمة, و حواليهم أمن بيتحكم في تحركاتهم, و قدامهم نعش جواه جسم متكفن اتقالهم ان ده بابا. دي كل علاقتهم باللحظات الأخيرة لبابا في عالمنا".

وأردفت: "دلوقتي بابا مش معانا .. خلاص مش محتاجة احافظ على قوتي و احاول اكلمه بلسان أولاده الثلاثة يمكن يعدل عن رحيله، وأختي و أخويا في السجن ظلم و مضربين عن الطعام، قلبي مش مطاوعني اكل و اكمل حياتي عادي و هم حارمين نفسهم من الأكل".

وأوضحت: "ماعرفش لسة قدرة جسمي على الاستمرار في الاضراب , ولا حدود عزيمتي، أتمنى يبقى في قدر كافي من  "صبر" أبويا و "عند" أمي يخليني أقدر ارافقهم في كل خطوة في  الرحلة دي لحد اما يخطوا برة أبواب السجن و يرجعوا البيت في وسط العائلة و الأحباب".

يذكر أن الناشطة السياسية منى سيف، أعلنت، أمس، عن دخولها هي ووالدتها الدكتورة ليلى سويف، في إضراب عن الطعام تضامناً مع إضراب أشقاءها، علاء وسناء سيف.

وقال "منى" في تدوينه لها عبر موقع التواصل الإجتماعي "فيس بوك": "أنا وماما بدأنا إضراب مفتوح عن الطعام.. القرار كنا واخدينه لحظة ما علاء أعلن إضرابه، وبعد ما انضمت له سناء، لكن أجلناه لأن كانت أولويتنا بابا وإننا نبقى في حالة تسمح إننا نخلي بالنا منه بابا رحل وساب دنيانا، واللي باقيين مننا سناء وعلاء في السجن ظلم، عشان كده قررنا نبدأ إضراب عن الطعام احتجاجا على قانون التظاهر اللي حارم عائلات كتيرة من أولادهم وبناتهم. ومضربين لحد لما يكتمل شمل عائلتنا بخروج سناء وعلاء ورفاقهم".

وأضافت ابنة "سيف الإسلام"، "قدمنا بلاغا للنائب العام النهاردة، استلموه مننا، وقالوا هيدونا رقم البلاغ يوم السبت وبعتنا تلغراف من السنترال- اخد رقم 14/14- للنائب العام لإعلامه بإضرابنا عن الطعام".

اقرأ أيضاً:

  • تعليقات فيسبوك
  • اعلان