رئيس التحرير: عادل صبري 02:20 مساءً | الثلاثاء 20 نوفمبر 2018 م | 11 ربيع الأول 1440 هـ | الـقـاهـره 28° صافية صافية

بالصور| طالب مصري يوثق يومه الدراسي بسخرية: "بنطلع الفصول بكل تحضر.. والمدرسين ملتزمين"

بالصور| طالب مصري يوثق يومه الدراسي بسخرية: "بنطلع الفصول بكل تحضر.. والمدرسين ملتزمين"

مصطفى محمود 04 أكتوبر 2017 19:21

بوجه بائس، سخر "كيرو نجاح"، طالب بالمرحلة الإعدادية، من  تفاصيل يومه المدرسي الذي وصفه بـ "الممل"، عبر حسابه على موقع التواصل الاجتماعي "فيس بوك".

 

 "كيرو" نشر العديد من الصور التي التقطها منذ وصوله إلى مدرسته  "أحمد حلمي الصفرا للغات" - حسبما وصفها -، حتى لحظة عودته إلى المنزل، وعلق على الصور، بالعديد من التعليقات الساخرة، والتي نالت استحسان عدد كبير من رواد "فيس بوك".

 

كتب الطالب على الصورة الأولى التي يظهر فيها منتظرًا وسيلة المواصلات: "بصحى 6 الصبح طبعًا بسرح شعري وبهتم بمنظري جدًا وأنا رايح المدرسة ومستني الأتوبيس اللي بيجي بسرعة رهيبة وبيبقى فاضي جدًا الصبح عشان أوصل لمكان التعليم العظيم".

والتقط الصورة الثانية على بوابة المدرسة، قائلاً: "بوصل المدرسة في أنضف الأماكن في الحياة تقريبًا حاطين الكاوتش ده يولعوه عشان منعرفش نخرج".

وبعد دخوله المدرسة، التقط صورة أخرى يعبر فيها عن استيائه من روتين الطابور، قائلاً: "طبعًا مفيش مدرسة من غير طابور وتمارين الصباح اللولبية أنا عايز أفهم الفكرة من 4 سقفات، لا بقى حد يفهمني أنا لما أسقف 4 سقفات الساعة 7 الصبح هستفاد إيه!؟".

وفي الصورة الرابعة، ظهر الطالب خلال استعداده للصعود إلى الفصل، وعلق قائلًا: "بنطلع الفصول بكل نظام وآدمية وتحضر".

وبعد دخوله إلى الفصل، التقط صورة مع عدم وجود مدرس داخل الحصة، وعلق قائلًا: "مع بداية الحصص واليوم المدرسي بعد التمارين العظيمة ندخل في التعليم بقى.. إيه ده؟!.. فين المدرسين؟! يوووه أصلهم نسيوا يقولوا إن مدرسين الحصة الأولى بيوصلوا على آخر الحصة بربع ساعة عشان الطريق بعيد طبعًا بالرغم من كل ده لسة محافظ على بسمتي وحماسي".

والتقط الصورة السادسة في "الفسحة المدرسية"، وعلق عليها قائلاً: "البريك أخيرًا الوقت اللي بترتاح فيه وتقعد مع أصحابك المهم بفضل قاعد فوق مبتسم ابتسامة أمل مش بنزل عشان الطلاب العظماء بيبقوا شوية (غنم) بيلعبوا في التراب".

وبعد "الفسحة" التقط صورة تظهر خلو الفصل من مدرس مرة أخرى، وعلق قائلاً: "طبعًا استحالة تلاقي طالب متضايق وسط فعاليات اليوم (اللهلوبة) دي، بس فين المدرسين؟! يوووه هو أنا ماقولتش؟! معلش بيطلعوا في آخر الحصة اللي بعد البريك بـ 10 دقايق عشان بيفطروا أمال الناس هتتعب طول اليوم ومتخدش غير بريك 10 دقايق يأكلوا ويرغوا فيه؟!.. ده حتى حرام".

ومع خروج الطلاب من المدرسة التقط صورة وعلق عليها قائلاً: "أخيرًا بنخرج في نظام وهدوء مع ابتعاد الولاد المحترمين (السرسجية)، عن البنات عشان البنات عندنا بتتكسف، وبنخرج كلنا سعداء على وجوهنا أجمل الابتسامات المصطحبة بجملة (يلا اللهي تولعوا كلكم)".

والتقط "كيرو"، صورة تاسعة بنفس تعابير الوجه البائسة، وعلق عليها قائلاً: "أخيرًا بعد ما وصلت البيت بكامل أناقتي ووسامتي أحب أشكر المدرسة على اليوم القذر ده وحقيقي كان نفسي أقعد فيكي وقت أطول بكتير بس للأسف عندي مرارة واحدة مرارتي مش كاسبها فكيس شيبسي عشان استحمل بيها الغباء بتاع المدرسين وصوت عمو اللي ماسك المايك اللي بيجعر في الطابور (ذراعين عاليا رفع).. اللي هاموت وأفهم إيه لازمتها".

وجاءت آخر صورة لتوصف الحالة العامة لـ"كيرو" بعد اليوم الدراسي الطويل من فيلم مصحوبة بتعليق "أنا زهقت".

  • تعليقات فيسبوك
  • اعلان