رئيس التحرير: عادل صبري 07:17 صباحاً | الاثنين 19 نوفمبر 2018 م | 10 ربيع الأول 1440 هـ | الـقـاهـره 26° صافية صافية

استغلوا إعاقته وجعلوه مادة للسخرية على السوشيال ميديا| أحمد الديب.. ضحية متعهدي الأفراح

استغلوا إعاقته وجعلوه مادة للسخرية على السوشيال ميديا| أحمد الديب.. ضحية متعهدي الأفراح

سوشيال ميديا

أحمد الديب - متعهد أفراح شعبية

استغلوا إعاقته وجعلوه مادة للسخرية على السوشيال ميديا| أحمد الديب.. ضحية متعهدي الأفراح

مصطفى محمود 03 أكتوبر 2017 13:54

في فترة قصيرة، تحول "أحمد الديب" إلى مادة كوميكس وفيديوهات ساخرة على السوشيال ميديا، بعد تجاوز مشاهداتها حاجز المليون، وذلك يرجع للطريقة الغريبة التي يحيي بها الأفراح بمحافظة الدقهلية، كذلك غنائه لأم كلثوم بصوت رديء.

"أحمد محسن"، مدون على موقع التواصل الاجتماعي "فيس بوك" كشف بعدًا جديدًا صادمًا لـ "أحمد الديب" لا يحتمل السخرية، وفي تدوينة مطولة على حسابه، قال: "النهاردة عايز اتكلم عن حاجة مختلفة شوية، وممكن يكون موضوع صادم لبعض الناس، اللي في الصورة ده شاب بينضحك على اداءه كتير في أغنية منتشرة اليومين دول اسمها (ريريري .. ايأ ايأ .. زكي يازكي).

 

وتابع: "اتعمل عليه كوميكسات تريقة في أكبر الصفحات، ومقاطع من أكبر مشاهير الفيديوهات، وكمان فيه فيديوهات تقليد عليه عدت المليون مشاهدة، وطبعًا ده كله أدى لهجوم كبير أرضًا وبحرًا وجوًا عالشاب ده من عدد كبير من الناس بدعوى التحشيش والتمثيل وغيره".

 

وواصل: "المهم بعد البحث المستفيض عنه، بياناته كالتالي، اسمه: أحمد الديب، عمره: 32 سنة، حالته الاجتماعية: متزوج وعنده 3 أولاد، محل إقامته: ميت غمر – الدقهلية".

 

وأردف: "طب ايه اللي بيخليه يعمل كده؟، الصدمة إن الشاب ده عنده (تأخر عقلي)، وشغال (عامل) في مستشفى (ميت غمر) تحت قانون الـ 5% لذوي الاحتياجات الخاصة، واللي بيكفل لهم حق (العمل والسكن)، للأسف بيتم استغلال إعاقته من متعهدين الأفراح الشعبية.. وعلموه من فترة يطبل وحفظوه شوية أغاني".

 

وروى: "مأساة الشاب ده دلوقتي إن بسبب إعاقته متعهدين الأفراح دول بيفوتوا عليه في البيت وياخدوه معاهم أفراح هم متفقين عليها بالنصب وبالاستغلال لحالته، ده طبعا عشان يضحكوا عليه الناس.. ويستغلوه بالشكل اللي انتم بتشفوه.. ومش هتلاقوا له فيديو واحد وهو بيتكلم طبيعي من مئات الفيديوهات له ع اليوتيوب".

 

واستطرد: "طبعًا فيه قوانين كتير لتجريم استغلال الشخص المتأخر أو المعاق، لكن الله أعلم محدش بيطبقها في حالة واضحة وضوح الشمس زي دي ليه، وأصحاب الأفراح اللي زي دي بيرضوها إزاي؟".

 

وأكمل: "اللي خلاني اكتب بوست زي ده لما عرفت إن عنده (3 أطفال أصحاء)، ومسيرهم يوم يشوفوا أبوهم في وضع زي ده، ويعرفوا إن كان فيه ناس بتستغله ويخلوا الدنيا كلها تضحك على إعاقته وهو لا حول له ولا قوة، كل اللي بتمناه إن (جهة رعاية نفسية وعقلية) تتبنى حالته، لأن الصراحة وسط المشاهدات المليونية لفيديوهاته وكوميكسات التريقة عليه، بياخد كمية شتايم ودعاوي من الناس يشيب لها الولدان، وهو طبعًا معندوش مقدرة الرد عليهم

 

وأوضح: "فياريت نعمل ثواب ونشارك حالته أو نعمل إشارة لمسئول.. لعل حد يتكفل بيه ويحميه من اللي بيحصله، والناس اللي علقت تحت بتقول كده هنقطع عيشه.. بقولهم لا والله.. إذا اتعالج هينمي موهبته كـ (كوميديان)، وشهرته اللي فاتت هتفتح أبواب رزق أكبر له ولأولاده، وبدون ما حد جشع يستغله بملاليم وهو بياخد من وراه آلاف ".

 

واختتم: "احنا اه بلدنا فيها الاسوأ، لكن مش لازم ننزل للقاع أوي كدة، والغلابة بتوع ربنا كمان ميسلموش من عمايلنا".

وكان رواد مواقع التواصل الاجتماعي، تداولوا مؤخرًا العديد من الفيديوهات لشاب يُحيي العديد من الأفراح بطريقة ساخرة، وتعرض للهجوم الشديد بدعوى أنه مدن مخدرات ويُحيي الأفراح وهو مغيب عن الوعي.

 

كما تداولوا أيضًا العديد من الفيديوهات الساخرة، من شهرة الشاب في الأفراح، أبرزها فيديو للشاب الساخر شادي سرور، والذي جاء بعنوان "كيف تصبح مشهور في 5 دقائق".

  • تعليقات فيسبوك
  • اعلان