رئيس التحرير: عادل صبري 01:09 صباحاً | الجمعة 16 نوفمبر 2018 م | 07 ربيع الأول 1440 هـ | الـقـاهـره 26° صافية صافية

"حجاجوفيتش": مقارنة بأوروبا.. شركات المحمول في مصر تقدم أسوأ خدمة بأعلى سعر

حجاجوفيتش: مقارنة بأوروبا.. شركات المحمول في مصر تقدم أسوأ خدمة بأعلى سعر

سوشيال ميديا

شركات المحمول

"حجاجوفيتش": مقارنة بأوروبا.. شركات المحمول في مصر تقدم أسوأ خدمة بأعلى سعر

مصطفى محمود 30 سبتمبر 2017 20:18

ندد الرحالة المصري، أحمد حجاجوفيتش، بقرار زيادة أسعار كروت الشحن، بنسبة 36%، موضحًا أن معظم دول العالم تسعى دائمًا لتقليل أسعار المكالمات.

 

"حجاجوفيتش"، قال عبر صفحته الرسمية على موقع التواصل الاجتماعي "فيس بوك": "للأسف على الرغم من إن العالم كله دلوقتي بيتكلم على الـ  5G وإن إزاي الشبكة الـ 5G حتوصل سرعة التحميل في الانترنت لـ 10 جيجا في الثانية الواحدة، يعني تنزل فيلم Full HD في أقل من ثانية، هنا في مصر لسة مفتكرين حاجة اسمها 4G، اللي العالم بقاله بيستخدمها من 2010، يعني ٧ سنين فرق ومحسسينا إنه إنجاز".

 

وتابع: "مش بس كدة أول ما طرحوها واللي مش لاقيها في أي مكان، راحوا هوب مخليين الكارت أبو ١٠ جنيه اللي بتدفع فيه أصلاً ١٢ جنيه بقي يديك ٧ جنيه، وده قمة الإعجاز العلمي، ما كانوا يخلوا الـ ٢ جنيه بجنيه على طول".

 

وأضاف: "في العالم كله بيدوروا إزاي يخلوا المكالمات بسعر قليل، زي أوروبا مثلاً اللي لغت كل تجوال المكالمات والانترنت بين كل بلادها، واحنا بنغلي كروت الشحن ونقلل قيمتها".

 

وواصل: "في مصر لو عاوز تعمل أصغر باقة للانترنت والمكالمات عاوز على الأقل باقة بـ ١٠٠ اللي حتدفعلها دلوقتي ١٧٠ جنيه فعليًا، في حين إن مثلاً في دولة زي الدنمارك الـ ٩٩ كرونة حتديك ٣٥ جيجًا ورسائل مجانية ملهاش عدد، وكمان ١٠ ساعات مكالمات لأي نمرة (أرضي أو موبايل) في الدنمارك وأوروبا و٤٧ دولة تانية كمان".

 

وأردف: "بالنسبة للمكسب احنا حوالي ١٠٠ مليون شخص (٢٠ ضعف سكان الدنمارك)، في حين إن الدنمارك ٥ مليون شخص، يعني لو شركات الدنمارك كسبت في الساعة على اسوأ تقدير مليون جنيه، شركات المحمول عندنا حتكسب ٢٠ مليون".

 

وتساءل: "يا ترى العيب في مين؟ فينا احنا كمستهلكين للخدمات وإننا بنسمح للشركات إنها تستغلنا؟ ولا في الشركات بإنها بتقدم اسوأ خدمة بأغلى سعر؟، ولا من الحكومة بإنها بتسمح بالاستغلال ده إنه يحصل؟، لازم كلنا نقف وقفة قوية قدام شركات المحمول الفاشلة اللي عندنا في مصر لغاية ما يحترمونا ويحترموا تفكيرنا ويعاملونا معاملة آدمية".

 

واختتم: "لو سكتنا المرة دي زي كل مرة، مش بعيد بعد كدة لما تشتري بـ ١٠٠ جنيه لحمة أو خضار، يقولك البايع هات ١٢٠ جنيه وحديك لحمة بـ ٧٠ جنيه، والنص لتر بنزين يبقى بـ ٥ جنيه ويقولك احنا ماغليناش قيمته احنا قللنا البنزين اللي حتاخده بالقيمة دي، لكي الله يا مصر، احنا بجد مقبلين على أيام سودة".

وتفاعل عدد من النشطاء مع منشور "حجاجوفيتش"، مؤكدين أن أسعار خدمات الاتصالات والانترنت في أوروبا أقل من مصر بكثير، بالإضافة إلى جودة مستوى الخدمة في أوروبا، فيما أكد آخرون أن شركات المحمول مغلوبة على أمرها لأنها تنفذ سياسات الحكومة.

وأعلن الجهاز القومي لتنظيم الاتصالات، عن زيادة أسعار كروت الشحن المدفوع مقدمًا بنسبة 36% ابتداء من أمس الجمعة لشركات الاتصالات الأربعة "فودافون وموبينيل واتصالات بالإضافة إلى we الخاصة بالشركة المصرية للاتصالات".

 

وأوضح الجهاز، أنه لن يتم زيادة قيمة الكروت، ولكن سيتم تخفيض قيمة المكالمات التي يقدمها، مضيفًا أنه على سبيل المثال، فإن كارت شحن 10 جنيهات سيباع بـ 10 جنيهات ويعطى رصيد 7 جنيهات، وكارت 100 جنيه سيباع بـ 100 جنيه ويعطى رصيد 70 جنيه.

  • تعليقات فيسبوك
  • اعلان