رئيس التحرير: عادل صبري 06:03 صباحاً | الخميس 15 نوفمبر 2018 م | 06 ربيع الأول 1440 هـ | الـقـاهـره 26° صافية صافية

خالد تليمة: قصة آية حجازي تؤكد كلام الرئيس أننا نعيش في «شبه دولة»

خالد تليمة: قصة آية حجازي تؤكد كلام الرئيس أننا نعيش في «شبه دولة»

سوشيال ميديا

خالد تليمة

خالد تليمة: قصة آية حجازي تؤكد كلام الرئيس أننا نعيش في «شبه دولة»

طارق عزام 22 أبريل 2017 18:37

علّق الإعلامي خالد تليمة على استقبال الرئيس الأمريكي، دونالد ترامب، للناشطة المصرية، آية حجازي، عقب أيام من براءتها من تهمة خطف أطفال الشوارع واستغلالهم.

 

وكتب «تليمة» عبر حسابه الشخصي على موقع «فيس بوك»: «شوية أسئلة تحتاج لإجابات.. حضرتك مش شايف إنك بدل ما تلوم آية حجازي تسأل نفسك ليه آيه خرجت دلوقتي بعد ما ترامب قال إنه طلب إنها تخرج؟ وليه، لو هي فعلا متهمة، السيسي استجاب لترامب وطلعها؟».


وتابع «تليمة»: «طيب مش أفضلك تسأل وتقلق عن طبيعة العلاقة بين السلطة التنفيذية على رأسها السيسي وبين القضاء اللي المفروض "مستقل"، يعني إيه هو شكل العلاقة اللي بين السلطتين اللي يخلي رئيس دولة تانية يطلب إن حد يخرج فيخرج ببراءة من القاضي اللي بيحبسه بقاله تلت سنين مش مثلا خد حكم وخرج بعفو من رئيس الجمهورية؟».


وأكمل «تليمة» تسائلاته قائلًا: «انت مش قلقان من العلاقة الفجة دي بين السلطة التنفيذية والقضاء وقلقان إن آيه قابلت ترامب؟ طيب مش زعلان إن السيسي استجاب لترامب وطلع آيه، بس عادي بالنسبالك إن السيسي ميستجبش لكل الدعوات الوطنية الصادقة بالإفراج عن الشباب المحبوسين في قضايا رأي والشباب اللي قالوا إن تيران وصنافير مصرية؟».


وأضاف «تليمة»: «على الجانب التاني إيه ممكن يزعلك كواحد بتدعم حرية آيه وجوزها إن حد يزعل ويتضايق من طريقة سفرها وصورتها مع ترامب؟ إيه ممكن يزعلك إن حد يسأل ويستغرب ويندهش طالما مش بيخون ولا بيتهمها؟ في الآخر بقى واقعة آيه حجازي من أول حبسها لحد صورتها مع ترامب لازم تأكد صحة كلام السيد الرئيس عن شبه الدولة إللى احنا عايشين فيها».

 

 

وكان الرئيس السيسي قد تحدث في مايو 2016، خلال إطلاق شارة البدء لموسم حصاد القمح بالفرافرة، وقال: «احنا مش في دولة حقيقية.. طلوا على بلدكم صحيح.. دي أشباه دولة مش دولة حقيقية».

 

واستقبل الرئيس الأمريكي، دونالد ترامب، ونجلته إيفانكا، الناشطة آية حجازي، بالبيت الأبيض، وأعرب ترامب عن سعادته بهذا اللقاء قائلًا: «نحن سعداء جداً بعودة آية إلى الوطن، شرف كبير أن تتواجد معنا في المكتب البيضاوي».

 

وبرأت محكمة جنايات القاهرة، الأحد الماضي، الناشطة آية حجازي و7 آخرين، من تهمة استغلال أطفال الشوارع، بعد حبسها لنحو 3 سنوات.

 

وجاء إطلاق سراح آية بعد نحو أسبوع من عودة الرئيس عبدالفتاح السيسي من أمريكا، وكانت تقارير إعلامية ذكرت أن الرئيس الأمريكي دونالد ترامب طلب من السيسي خلال زيارة الأخير لواشنطن إطلاق سراح المعتقلين الأمريكيين في مصر.

  • تعليقات فيسبوك
  • اعلان