رئيس التحرير: عادل صبري 04:54 صباحاً | الثلاثاء 11 ديسمبر 2018 م | 02 ربيع الثاني 1440 هـ | الـقـاهـره 22° غائم جزئياً غائم جزئياً

"يا منال يا منال الشبكة شمال".. رسالة قاسية من ناشط إلى فودافون واتصالات

يا منال يا منال الشبكة شمال.. رسالة قاسية من ناشط إلى فودافون واتصالات

سوشيال ميديا

بوستر اعلان فودافون الجديد 2016

"يا منال يا منال الشبكة شمال".. رسالة قاسية من ناشط إلى فودافون واتصالات

مصطفى المغربي 10 يونيو 2016 11:04

شن ناشط يدعى محمد بن جمال هجومًا حادًا على شركتي فودافون واتصالات لخدمات المحمول على خلفية إعلاناتهم الجديدة.

 

وقال في تدوينة عبر حسابه على موقع التواصل الاجتماعي "فيس بوك": "عزيزتي فودافون واتصالات تحية طيبة وبعد، أنا كمستخدم لا يشغل بالي إذا كان شريف منير فودافون ولا لأ، مش مهتم اعرف شيرين 010 ولا 012، عمري مافكرت سمير غانم بينتمي لأي شبكة ولا يفرق معايا كل النجوم دول ببصلة، الدنيا اتغيرت واتطورت ومبقاش ده اهتمامنا".

 

وتابع: "أنا كمستخدم مايفرقش معايا أغنية أصالة في إعلان اتصالات، مايفرقش معايا التوكتوك الملون ازرق واحمر بتاع الجونة ده عشان التوكتوك اللي بركبه بيبقي أسود في أصفر، بياكل مطبات الأسفلت كلها عشان يبوظلي ضهري، والواد اللي سايقه مشغل أغنيه مش هتيجي ..مش هروح بتردد كفيل بأنه يخرم طبله ودنك".

 

وأضاف: "عمري مافكرت اطلع إيدي من التوكتوك واخد سيلفي، مش عشان حاجة بس عشان سواق التوكتوك مايقولش عليا عبيط، وعشان مايجيش واد بمكنه صيني يشده مني، مأثرش فيا مشهد لما كانوا بيلعبوا بالدقيق في المطبخ وبيرشوه على بعض، يمكن عشان احنا كمصريين لو أمي دخلت علينا المطبخ لقيتنا بنرش الدقيق على بعض وبنضحك، ما اعتقدش إنها ممكن تبيتنا في البيت تاني؟، ده طبعًا غير إنها هتقولنا في حد يعمل كدا في نعمة ربنا، وإن شاء الله ذرات الدقيق دي هتجري وراكم يوم القيامة، وهتسود عيشتنا".

 

وواصل: "للأسف انتوا اختلزلتوا الحياة في color Festival والجونة، وأعياد ميلاد، وbikinis و Tattoos و photo Sessions ويا منال يا منال الأكل شمال، بس أنا كمستخدم كل اللي يفرق معايا إنك تحسن الخدمة، تعملي عروض محترمة، ماتخصمش مني كل شهر عافيه 51 قرش ضريبة دمغة لحد دلوقتي مش عارف بتاعت إيه، الشبكه تبقى موجودة في البيت كله مش في الحمام بس، مايصحش اعمل مكالمات الشغل من الحمام".

 

وذكر: "أنا كمستخدم عاوز نت كويس مش تسحب فلوسي وخلاص، عاوز شبكة قوية، عاوز ابقي ماشي بخط واحد بس مش ب 3 خطوط عشان كل مكان في الشقة ليه شبكته المميز بيها، وبرضو انت عمال في كل إعلان بتفكرني إنك كنت معايا دايمًا في اللحظات الحلوة، بس نسيت إنك في اللحظات الصعبة اللي كنت مستنيك فيها مكنتش معايا، أنا ما نستش يوم ماقطعت عليا الاتصالات في الوقت اللي كنت محتاجك فيه، مانستش حرقت قلب كام أم وأب على ابنها لساعات كنت قاطع عليا شبكتك اللي بتفخر إنها قويه ورقم واحد، عشان مصلحتك، انت كنت معايا في الهلس وفي الوقت اللي بتلم فيه مني الفلوس وقت تجديد الباقة والنت، لكن ساعة الجد، ملقتكش، سبتني أموت عشان انت تعيش وتكبر وتعمل إعلانات".

 

وأردف: "ع العموم ياسيدي إعلاناتكم حلوة وظريفة بس مش إعلانات لشركة بتقدم خدمه اتصالات ومحمول، ممكن تكون إعلان تحت مسمى "شايف في حاجات حلوة في الدنيا ازاي انت ماتعرفهاش؟، اتعب بقى عشان ربنا يرزقك الجنة اللي أحسن من كل ده، وشكرًا، ‏يامنال يامنال الشبكة شمال‬".

وجمع إعلان "فودافون" الأخير عددًا من نجوم مصر من بينهم الفنان أحمد السقا وشريف منير وحكيم وإسعاد يونس ومحمود العسيلي وسمير غانم ودرة ومنة شلبي وأشرف عبدالباقي وشيرين عبد الوهاب.

 

اقرأ أيضًا:

  • تعليقات فيسبوك
  • اعلان