رئيس التحرير: عادل صبري 04:49 صباحاً | الجمعة 21 سبتمبر 2018 م | 10 محرم 1440 هـ | الـقـاهـره 36° صافية صافية

تامر أبو عرب يكتب: 10 أسباب تؤكد نجاح مظاهرات 25 أبريل

تامر أبو عرب يكتب: 10 أسباب تؤكد نجاح مظاهرات 25 أبريل

سوشيال ميديا

تامر أبوعرب

تامر أبو عرب يكتب: 10 أسباب تؤكد نجاح مظاهرات 25 أبريل

غادة بريك 26 أبريل 2016 13:08

رأى الكاتب الصحفي تامر أبو عرب، أن دعوات التظاهر التي أطلقها عدد من النشطاء تحت شعر "مصر مش للبيع"، أمس الإثنين، لم تفشل كما يصفها البعض.


ووأوضح في تدوينة مطولة عبر صفحته الشخصية بموقع التواصل الاجتماعي "فيس بوك" الأسباب التي يرى من خلالها نجاح مظاهرات "مصر مش للبيع" من وجهة نظره.


قال أبو عرب: مين قال إن اليوم فشل؟ لو كان مليون شخص نزلوا التحرير النهاردة وهتفوا ضد بيع الجزر وضد النظام وروّحوا مكانش هيبقى تأثيرهم أكبر من تأثير اللي حصل في الـ10 ساعات اللي فاتوا.

1- كشف بوضوح مين اللي كان صح ومين كذاب، خبر الشروق اللي قال إن السيسي طلب متحصلش مظاهرات معارضة في 25 أبريل بأي ثمن وإن فيه حملة اعتقالات هتحصل، ولا بيان الرئاسة اللي نفى صحة الخبر ده وقال إنه مش صحيح.

2- رد على أي حد بيقول إن السيسي حلو بس اللي حواليه وحشين، لا، السيسي شريك في كل حاجة، ولو في أقصى درجات التفاؤل وحسن النية صدقنا مش هو اللي أدى أوامر باللي حصل النهاردة، فعلى الأقل هو شايف وموافق وراضي ومؤيد لكل اللي حصل ولسة بيحصل.

3- فضح اهتزاز السلطة وعدم ثقتها في نفسها وفي شعبيتها المزعومة، السلطة اللي بيدعي دراويشها طول الوقت إن ليها شعبية كاسحة ساحقة ماحقة ركبها خبطت في بعضها بدعوة تظاهر على الفيس بوك، حشدت آلاف من جنودها ونزلت مدرعاتها في الشوارع وعملت حالة استنفار قصوى كلفتها ملايين علشان تواجه مظاهرات سلمية تمامًا بتأكد بس حق مصر في الجزيرتين.

 

4- بينت قدرة السلطة على الحشد حاليًا، بعد ما رأس السلطة نفسه طلب من الناس تنزل الشوارع تحتفل وتواجه مخططات الفوضى اقتصر المشهد على عدة مئات أغلبهم وجوه معروفة بأنها "مؤيدين بأجرة" ومتخصصين في الرقص على الدي جي وأحيوا عيد تحرير سينا على أنغام "آه لو لعبت يا زهر" وقدموا صورة مهينة للنظام أكبر من أي إهانة كان ممكن يوجهها له المتظاهرين المعارضين.

5- وضحت إن الهتاف ضد السيسي ونظامه معادش خط أحمر زي زمان، دلوقتي الناس بتتظاهر في قلب القاهرة والجيزة في مناطق سكنية مأهولة ومزدحمة والسكان محايدين تمامًا، اللي مش مع المظاهرات منهم فهو على الأقل مش ضدها ومش مستعد يدخل في مواجهات معاها، وقعدوا يتفرجوا على المطاردة والكر والفر بين المتظاهرين والشرطة بحياد شبه كامل.

6- هدمت أسطورة السلطة الوطنية اللي مشروعها الأول الحفاظ على الدولة، بعد ما ظهر مؤيدوها في مناسبة وطنية زي تحرير سيناء بأعلام السعودية، وقالوا بالفم المليان إن سلمان لو عاوز الهرم وأبو الهول كمان هنديهم له، ووضح انحياز الدولة الكامل للطرف البائس بتاع أعلام السعودية، ومعاداتها للطرف اللي رافض يفرط في الأرض، وبالتالي الناس اللي كانت أهم مشكلة ليهم مع مرسي إنه عاوز يدي حلايب وشلاتين للسودان - رغم إن الرئاسة نفت ده وقتها - هيلاقوا أزمة نفسية كبيرة وهم بيأيدوا ويبرروا لنظام مش بس بيفرط في قطعة أرض ربما تفوق أهميتها الاستراتيجية أهمية مثلث حلايب وشلاتين، ده كمان بيحبس ويطارد أي حد ضد البيع ده.
 

7- انكسرت هيبة الشارع مرة تانية، ونزل شباب كتير وهم شايفين حملات الاعتقال المسعورة اللي شغالة من 5 أيام، وعارفين الحشد والاستنفار الكامل لقوات الشرطة في الشوارع، ووصلهم بيان الداخلية اللي بيهدد أي حد ينزل، وشايفين مدرعات الجيش وهي موجودة في الميادين، وعارفين إن المواطنين "غير الشرفاء" بيتم تعبئتهم على الشوارع للاشتباك مع المعارضين لو لزم الأمر، صحيح الأعداد مش كبيرة لكنها مقبولة جدا في الظروف دي، وهتزيد في المرات الجاية اللي صعب جدًا حشد الدولة والحشد ضدها يكون أكتر من المرة دي.

8- اتكتبت شهادة وفاة قانون التظاهر غير الدستوري نهائيًا، صحيح هيفضل الشباب يتحبسوا ويتهددوا بيه لكن خلاص مبقاش حاجة مانع للنزول، وأي قانون يفقد قدرته على الردع المسبق بيكون هو والعدم سواء.

9- رجعنا مرة تانية لمرحلة توازن الرعب، السلطة خدت قرار التفريط في الجزيرتين وهي متأكدة أن الشارع مات تمامًا وآخره شوية هيصة على الفيس بوك والموضوع يخلص بعد كام يوم، والأكيد إنها لما تيجي تاخد قرار بعد كدة هتعمل ألف حساب لرد فعل الشارع اللي رجع تاني يكون طرف في المعادلة بعد 3 سنين من الموات.

10- البركة في الشباب.



 

يذكر أن عدد من النشطاء والحركات الثورية والأحزاب السياسية قد دعت للتظاهر أمس الإثنين، احتجاجًا على التنازل عن جزيرتي "تيران وصنافير" لـ المملكة العربية السعودية، وفقًا لاتفاقية ترسيم الحدود البحرية بين البلدين.

اقرأ أيضًا:

  • تعليقات فيسبوك
  • اعلان