رئيس التحرير: عادل صبري 03:44 مساءً | الأربعاء 14 نوفمبر 2018 م | 05 ربيع الأول 1440 هـ | الـقـاهـره 26° صافية صافية

دعوة لإضراب عام "لا للمواعين في رمضان"

دعوة لإضراب عام لا للمواعين في رمضان

أخبار رمضان

يارب المواعين تموت

البنات: "يارب تموت المواعين"..

دعوة لإضراب عام "لا للمواعين في رمضان"

سمية الجوهري 17 يوليو 2014 08:08

(من صباحية ربنا تلاقي الست من دول واقفة ياعين أمها في المطبخ عشان تلحق تخلص الفطار قبل المغرب اللي طبعا بيبقى 100 صنف ونوع  في رمضان عشان زى مانتوا عارفين إحنا  شعب صحي بطبعه.. لكن وقفتها في الصيام طول النهار دي كوم وبعد الفطار والمواعين دي كوووم تاني).

 

المواعين اللي بتفضل تغسل فيها من بعد الفطار لحد بعد السحور.. إيشي كوبايات العصاير وبعدها أطباق الفطار ده غير الحلل والصواني.. وبعدين عصاير تاني بعد الفطار وده معناه كوبايات تاني.. وآه بقى بعد صلاة العشا وأطباق الحلويات واللمة تحلى وطبعا المواعين هاتحلى مع اللمة.. وما بالك من أطباق وشوك الحلويات.. يدوبك تيجي ترتاح تلاقي نفسها بتقوم تحضر السحور وبعدها مواعين السحور.. ويا قلب أمها تدخل ترتاح وتناملها شوية تلاقي نفسها بتحلم هاتحضر إيه للفطار بكرة وبالطبيعي تلاقي نفسها بالوراثة هاتفكر في المواعين اللي بعد الفطار اللي بتحلم بيها.

 

                           قومي اغسلي المواعين يا بنت

 

"والحقيقة إن معاناة الست في غسل المواعين اللي بتكتر بشكل غير طبيعي في رمضان سبحان الله مع إن المفروض إنها تقل لأن ده "شهر الصوم" بس مش مشكلة مانتوا عارفين برضه إننا شعب متناقض بطبعه.."يعنى إنتي عايزانا نبقى صايمين طول النهار ومانكلش كويس في الفطار لحد السحور" لا لسمح الله..

 

المهم إن المعاناة دى بتبدأ تقريبًا مع البنت وهي لسه في بيت أهلها.. ولو سألت أي بنت مصرية أصيلة إيه أكثر الكلام المؤثر اللي بتسمعيه من مامتك في فترة شبابك هاتجاوب بكل تلقائية مليانة بالأسى (قومي اغسلى المواعين يا بنت) خصوصًا في الشهر الكريم اللي بتكتر فيه العزومات واللمة "ما هو رمضان بيقربنا" وتفضل المسكينة تغسل في المواعين لحد ما تتجوز وتزيد المسؤولية عليها أكتر.. وتجيب بنات وتربيهم وتكبرهم وتمارس العقدة اللي زرعتها فيها مامتها على بناتها وتلاقيها طول النهار تقول لبنتها "قومي اغسلي المواعين يا بنت".

 

               إضراب عن غسل المواعين في رمضان

 

وفي وسط الكلام  اللي كتر عن الموضوع ده وناس كتيرة ولاد حلال اتدخلوا.. طلعت شوية ستات بـ 100 راجل قالت إحنا هانعمل إضراب عن غسل المواعين في رمضان.. وكفاية إننا طول النهار واقفين في المطبخ بنحضر الفطار.. يبقى كل واحد مسؤول عن غسل طبقه بعد الأكل.. يعني يبقى الراجل مقضيها أنتخة طول النهار وسهر باليل وإحنا مقضينها معاناة.. لا إحنا هانعمل إضراب.. لكن النتيجة كانت زي أي إضراب بيتعمل اليومين دول ماحدش سأل فيهم.. وقالوا سيبوهم شوية وهما هايزهقوا وهايلاقوا المطبخ اتكوم عليهم وهما الخسرانين في الآخر.. والطبيعي الإضراب باء بالفشل في النهاية "الستات دول مساكين مش مجانين زي ما أبو الليف قال في أغنيته الشهيرة الستات دول مجانين".

 

                       حل مشكلة المواعين في خطوات

 

وعشان إنتي كده كده اللي هاتدبسي في المواعين في نهاية الأمر المتعلق بالمطبخ هاحاول أقدملك مجموعة نصايح بسيطة تقلل شوية من معاناتك في غسل المواعين خصوصًا في رمضان.

 

الأول قبل ماتبتدي في أى تحضير الأكل اغسلى البوتاجاز وخليه نضيف ده هايسهلك إنك لما تخلصي الأكل تمسحيه بس بفوطة المطبخ على طول لأنه هايبقى نضيف وسهل التنضيف.


بصي على الحوض ولو لاقيتي أي حاجة من مواعين إمبارح مش نضيفة اغسليها قوام قوام وابتدي الأكل وكل حاجة في الحوض مغسولة ونضيفة.


كده هاتبقى الخطوة الأولى من المشكلة اتحلت وهي مشكلة التراكم.


حاولي إنك أي معلقة أو طبق أو مصفة أو شفشق خلاط تستخدميه وإنتي بتطبخي تغسليه أول بأول وماتكوميش أي حاجة في الحوض.. هتلاقي نفسك في الآخر خلصتي الأكل ومفيش أي مواعين في مطبخك خالص.


ماترميش أي حاجة استخدمتيها في مكان غير مكانها في المطبخ.. ورجعي كل حاجة تغسليها في مكانها عشان تلاقي المطبخ متروق على طول وإنتي بتطبخي.. يعني رجعي الخلاط مكانه.. شيلي المصفى في الرف بتاعها.. رصي المعالق في مكانها.


وبكده هتلاقي تاني مشكلة اتحلت وهي مشكلة "ترويق المطبخ".


بعد الفطار لمي الأطباق واغسليها على طول.. مانتى سايبة مطبخك نضيف ومافيش إلا مواعين الفطار مش هاتاخد منك دقايق.. وكمان اعملي كده بعد السحور.


في النهاية هتلاقي الموضوع سهل ومفيش حاجة متراكمة على حاجة ومش هاتحسي بالتعب لأنك بتغسلي وتنضفي أول بأول.


وبكده أهم مشكلة اتحلت وهي مشكلة المواعين

 

اقرأ أيضًا:

 

  • تعليقات فيسبوك
  • اعلان