رئيس التحرير: عادل صبري 01:53 مساءً | الثلاثاء 20 نوفمبر 2018 م | 11 ربيع الأول 1440 هـ | الـقـاهـره 28° صافية صافية

يلا نرجع لمتنا.. زمان كان رمضان بجد

يلا نرجع لمتنا.. زمان كان رمضان بجد

رمضان والصيف

يلا نرجع لمتنا

يلا نرجع لمتنا.. زمان كان رمضان بجد

سمية الجوهرى 12 يوليو 2014 09:15

بفتح رسايل الفيس بوك عندى لاقيت رسالة خاصة من جوزى بتقول لازم تتفرجى على الفيديو ده لأنه هايفرحك اوى ويخليكى تحسى بذكريات زمان اللى اشتقتى ليها....قلت فى بالى اكيد فيديو ليوم فرحنا او لشهر العسل لكن بعد مافتحته لاقيته إعلان بيبسى "يلا نرجع لمتنا "وده كان مع بداية رمضان. اتفرجت عليه مرة واتنين وتلاته وحسيت بنفس إحساس الحنين اللى حسه جوزى بلمة زمان اللى افتقدناها وخصوصا فى شهر رمضان اللى كان معناه اللمة والأهل والصحبة..

                         اللمة كانت أحلى

بعدها مفيش بثوانى لاقيت صديقة ليه مشيره الفيديو على صفحتى وبتهدهولى وبيتهديه لكل أصحابها..ومفيش دقايق ولاقيت الفيديو كل اصحابى تقريبا اللى على الفيس بوك بيتكلموا عنه..وكأنه إتكلم على الكنز المفقود واللى الناس بقت مشتاقه انها تدور عليه..وعلى الرغم ان ابطال الأعلان مالهومش علاقة اوى برمضان غير بوجى وطمطم تقريبا الا انهم ارتبطوا بذكرى اللمة ..من مسرحية المتزوجون اللى الناس كلها فى العيد كانت بتتلم عشان تتفرج عليها.ونجوم الجيل هشام عباس وحميد.وبوجى وطمطم وبقلظ اللى اطفال الجيل ده كله اتربى عليه وفرقة فور إم وغيرها...

                                   يعيد الذكريات

سألت بعدها جوزى اللى من جيل الثمانينات ليه الإعلان شدك كده ( قالى لأنه رجعنى لأحلى ذكريات عمرى فكرنى برمضان واللمة اللى بجد ..مش اللمة اللى نبقى انا واصحابى كلنا قاعدين على كافيه ومتجمعين لكن كل واحد فاتح موبايله وعايش فى العالم اللى جواه كل واحد قاعد يلعب على الموبايل او يتفرج على فيديو او فاتح الفيس بوك عنده ..آه متجمعين لكن بأجسامنا لكن فين لمتنا عشان نتفرج كلنا على برنامج واحد ونقعد مبسوطين اننا بنتفرج عليه..فين لمة الفطار والواحد رايق البال..مش تلاقى دلوقتى ان اصعب حاجة انك تلم عيلتك كلها على الفطار لأن ده مشغول وده عنده ظروف وده جاى يفطر وينزل جرى يلحق مشواره..اللمة زمان كانت احلى حتى لو كنا بنتجمع برضه دلوقتى..)

                  الزينة والفوانيس وطبق القطايف

وعن أسماء أحمد تقول ( الإعلان ده الناس كلها حبيته عشان فكرنا برمضان اللى كان بجد رمضان ..من تعليق زينة فى الشوارع قبل رمضان بكام يوم ولعب الأطفال بالفوانيس وطبق القطايف اللى جاى من عند جارتنا النهاردة واحنا تانى يوم نردهلها و فيه كنافة من عمايل ماما مش جاهزة زى دلوقتى من عند الحلوانى ..لكن دلوقتى مابقتش الزينة دى موجودة ..والأطفال بدل مابقوا يلعبوا بالفوانيس بقوا يلغبوا بالشماريخ والصواريخ فى الشوراع "العنف اللى اتعلموه من المسلسلات والأفلام " كل جار بقى قى حاله مابقاش حد يودى لحد حاجة ولا ياخد من حد حاجة ..لأن مابقتش فيه لمة ولا حب زى زمان ورمضان مابقاش حد يحس بيه خالص )

                        مسلسلات لها قيمة

لكن رشا خليفة قالت ( رمضان زمان ماكنش مرتبط باللمة بس لكن كان مرتبط بأحاسيس تانية اجمل .كان عبارة عن كوباية العرقسوس ومعاها كوباية البلح باللبن..وبعدها نقوم نصلى ورا بابا المغرب ونقعد نتفرج على عمو فؤاد واحنا بنفطر. وبابا يقعد يأكدلنا على المعانى المفيدة بعد الحلقة عشان نستفيد منها..لكن دلوقتى على الفطار اولادى يقلولى يلا ياماما عشان نلحق فؤش فى المعسكر برنامج المقالب وبعدها رامز قرش البحر..ولما سألت ابنى و قلتله انت بتحب تتفرج على البرامج دى ليه..قالى عشان نضحك ياماما "مش هما عاملنها عشان نضحك.." ده رمضان اللى بقوا يعلموه لأولادنا غير كم المسلسلات اللى كلها الفاظ جارحة ومشاهد خليعه وقال ايه بعدها رمضان يجمعنا..يجمعنا على ايه؟على قله الأدب..)

                               تواشيح قبل الفطار

وبالنسبة للمة عند محمود عبد العليم قال ( اللمة تحلى.بس هى فين اللمة..فين لمتنا زمان لما كنا بنقعد مع اهالينا وقاريبنا مع عماتى وخلاتى واعمامى واولادهم..فين هما دلوقتى كل واحد بقى مشغول بحايته..فين لمتنا واحنا قاعدين بنتفرج على قناة او قناتين فيهم بالكتير 3 مسلسلات منهم واحد دينى..فين صوت التواشيح قبل الفطار مع دروس الشعراوى فين فوازير شريهان ونيلى اللى كانت بتقدم فن حقيقى بدون سفاهه..فين المال والبنون والتتر بتاع المسلسل اللى كان حكاية لوحده بمابالك بمسلسل ولا فيه ولا لقطة خارجة ولا لفظ جارح ولا ملابس مثيرة..ايام ماكان الفن له رسالة وهدف..

                           المسحراتى وطبلته

وتختتم الآراء أمل وتقول (فين المسحراتى وطبلته اللى كان بيعدى تحت باب البيت قبل الفجر عشان يصحى الناس لأن الوقت كان فى بركه وكانت الناس تنام وتقوم تتسحر..لكن الناس دلوقتى تلاقيها سهرانة طول الليل عشان تلحق تخلص كمية المسلسلات والبرامج اللى بتتعرض على القنوات الفضائية..اللى مهما اتفرجت عليهم مش هاتلحق تخلصهم برضه ..فين وفين..فعلا رمضان كان زمان اخلى واقيم واعظم..واللمة فيه كانت احلى حاجة بتخلينا نحس بجو رمضان..)

 

شاهد فيديو لعمو فؤاد:

 

اقرأ أيضًا:

 

 

  • تعليقات فيسبوك
  • اعلان