رئيس التحرير: عادل صبري 09:44 صباحاً | الجمعة 17 أغسطس 2018 م | 05 ذو الحجة 1439 هـ | الـقـاهـره 37° صافية صافية

بالصور| "عزبة الصفيح" خارج الخدمة.. والأهالي: نراهن لو المحافظ يعرفها

بالصور| عزبة الصفيح خارج الخدمة.. والأهالي: نراهن لو المحافظ يعرفها

تقارير

جانب من معاناة أهالي عزبة الصفيح بالإسماعيلية

في الإسماعيلية

بالصور| "عزبة الصفيح" خارج الخدمة.. والأهالي: نراهن لو المحافظ يعرفها

ولاء وحيد 05 ديسمبر 2015 21:11

حالة من الغضب بين أهالي عزبة الصفيح، بقرية "المنايف" بالإسماعيلية، بسبب كثرة مشاكلهم وتفاقمها وعلى رأسها "موت أطفال مدرسة غريب سلامة على الصحراوي، وأزمة طفح المجاري وانتشار الأمراض وانقطاع المياه المتكرر وتلوثها، وتهالك أعمدة الكهرباء والأسلاك.

 

سيد أبو عواد 21 سنة عامل من أهالي عزبة الصفيح قال شاكيًا المسؤولين: "محدش بيسأل عننا ولا عمرنا شوفنا حد من المسؤولين وأراهن إذا كان المحافظ يعرف إن فيه عزبة هنا اسمها الصفيح" .
 

 

وأضاف لـ "مصر العربية": إحنا هنا خارج نطاق الخدمة في كل حاجة؛ المية بتيجي ساعتين في اليوم زي الطين وعربيات الكسح بتاعة مجلس المدينة مش بتيجي تنزح الصرف".

 

وتابع: "إحنا بنجيب عربيات على حسابنا تنزح الصرف وعواميد الكهرباء هنا كلها مطفية ولو نزل عليها شوية مطرة تعمل ماس وشرارة وتكهرب العيال والكبار ..ولا فيه وحدة صحية نعرف ناخد فيها حقنه لو حد فينا تعب.. والمواصلات مبتوصلش للعزبة هنا لازم نمشي 2 كيلو لحد الطريق عشان ناخد مواصلة ننزل بها الاسماعيلية ".

 

وداد عزب أرملة 36 سنة من أهالي العزبة قالت لـ "مصر العربية":  "إحنا  مش عايزين  حاجة راضيين بالفقر وقلة الحيلة  بس كل اللي عايزينه كوبري على الطريق عشان العيال وهي رايحة المدرسة مدرسة غريب سلامة الابتدائية - وكوباية ماية نضيفة عشان مش معانا نتعالج ولا نعالج عيالنا".
 

وتابعت: "الأسبوع اللي فات ماتت بنت صغيرة من العزبة اللي جمبنا وهي بتعدي الطريق عشان تروح مدرستها، وخبطتها عربية والبت ماتت في ساعتها ودي مش أول واحدة ".

 

وواصلت: "ده احنا كل سنة على الحال ده، وريقنا نشف عشان يعملوا كوبري بين جنب الطريق العيال تعدي من عليه وهي رايحة المدرسة ومحدش سأل فينا ..جه المحافظ وقال هيعمل كوبري قدام مدرسة الإمام مالك اللي في عزبة الكهرباء وده من أول الدراسة ولا عملوا كوبري في العزبة اللي هناك ولا في العزبة ده .... ..يا ناس هي  أرواح ولادنا ودمهم رخيص في نظركم كده ".
 

نجاح عودة 50 سنة من أهالي العزبة اشتكت من انقطاع المياه وتلوثها قائلة: "لو شوفتوا الماية اللي نازلة من الحنفية مش هترضوا تغسلوا بها ايديكم ...لكن إحنا بنشربها ومعندناش غيرها ولا حيلتنا فلوس نشتري مية معدنية".

 

ومن جانبه، قال مسؤول بالوحدة المحلية لقرية المنايف لـ "مصر العربية" ـ رفض ذكر اسمه - "خاطبنا المحافظة عدة مرات ومجلس مدينة أبوصوير بأهمية إنشاء 6 كباري مشاة على طريق القاهرة /الإسماعيلية الصحراوي  أمام عزب القرية المنتشرة على جانبي الطريق وهذه الخطابات تجددت مع أعمال توسعة الطريق.

 

وأضاف أن محافظ الإسماعيلية اتخذ قرارًا بالتنسيق مع الهيئة الهندسية للقوات المسلحة بإنشاء كوبري مشاة أمام عزبة الكهرباء وجارٍ دراسة إنشاء كباري مشاة في المنطقة".


وعن تهالك أعمدة الكهرباء والأسلاك في عزب القرية أكد أن القرية خاطبت شركة الكهرباء ليتم استبدال اسلاك الجهد المتوسطة بأخرى وتم إجراء عملية إحلال وتجديد لأسلاك الكهرباء داخل عدد من العزب وجارٍ استكمال باقي العزب طبقًا لخطة شركة الكهرباء ".


 




  • تعليقات فيسبوك
  • اعلان