رئيس التحرير: عادل صبري 08:08 مساءً | الجمعة 16 نوفمبر 2018 م | 07 ربيع الأول 1440 هـ | الـقـاهـره 26° صافية صافية

مواطنة بالإسكندرية: 5 أرغفة يكفوا مين؟

عمال المخابز: المنظومة ريّحتنا

مواطنة بالإسكندرية: 5 أرغفة يكفوا مين؟

رانيا حلمي 05 أغسطس 2014 12:48

"الخمسة أرغفة دول يقضوا مين في اليوم؟ حاكل من أكل عيالي؟ طب واللي ماعندهوش بطاقة يعمل إيه؟".. هكذا وقفت الحاجة نعمة تتمتم منتقدة منظومة الخبز الجديدة التي بدأ تطبيقها في الإسكندرية، فالحاجة التي يعتمد بيتها على الخبز كوجبة أساسية تدخل في جميع الوجبات رأت ذلك التحديد ظالما، وهو الرأي الذي خالفه آخرون معتبرين أن "المنظومة جيدة جدا وأنها منعت الاستغلال، وكل واحد بيأخذ حاجته".


 

ردود فعل متباينة حول منظومة الخبز الجديدة عقب تطبيقها بالإسكندرية، البعض يراها تعيد الحقوق وتمنع الاستغلال من قبل من يتاجرون بالعيش، والبعض يراها ظالمة لا توفر له حاجاته.


 

في أحد أفران منطقة كوبري الناموس بالإسكندرية وقفت مدام نعمة متسائلة: "الخمسة أرغفة دول يقضوا مين في اليوم؟ حاكل من أكل عيالي؟ طب واللي ماعندهوش بطاقة يعمل إيه؟"


 

بينما علقت مدام حنان قائلة: "المنظومة جميلة جدا ومنعت استغلال الناس, الأول كانوا بياخدوا بالعشرين جنيه، دلوقتي كل فرن بيتحاسب على الدقيق وكل يوم بتاخدي بجنيه، بقى بجنيه عيش مش حيقضيكي؟"


 

وفي منطقة سموحة قالت مدام فايزة: "البطاقة (التموينية) مش عند كل الناس علشان يخلوا العيش على البطاقة، إذا كان في حد له الأولوية أنهم يأخذوا بطايق علشان العيش المفروض يخصصوا جزء للأرامل، أنا لحد دلوقتي ماطلعليش بطاقة تموين، ومش حفكر أروح الفرن علشان أشتري أبو 35 قرشا، ما أنا بشتري أبو 50 قرشا وأنا معززة مكرمة، ليه أشتري من الفرن بـ35 قرشا وفي زحمة وطابور؟"


 

بينما أكدت أم إسلام في المقابل أنه "دلوقتي أحسن طبعا, الأول كان في ناس بتاخد وناس لأ دلوقتي كل واحد بيأخد حاجته".


 

من جانبه طالب "عبدالله إسماعيل" بزيادة ساعات العمل في الأفران فقال"أنا دلوقتي راجل عاجز ببعت حفيدي بالكارت، الله أعلم بقى اللي في الفرن بيأخد أد إيه، ياريت يأخروا فترة العمل ولو حتى للساعة 5 علشان الناس تنزل بعد الشغل تقدر تشتري العيش، ولو يعملوا وردية تانية".


 

وقال "محمد" أحد العاملين بالمخبز"المنظومة الجديدة دي ريحتنا من وجع الدماغ؛ الأول كان كل شوية خناق وكل واحد عاوز ياخد ب5 جنيه دلوقتي راحة؛ أنا بخلص الحصة بتاعت اليوم ووقت ما بتخلص بنوقف شغل".


 

وقال "محمد أنور" الشهير "بأيوب" أحد العاملين بالمخبز: "المنظومة ريحتني في منطقة زي دي؛ منطقة عليها مشاكل كتير، وإقبالية كبيرة؛ عندنا مخابز كتير بس الإقبال هنا أكتر علشان العيش أحسن، واحنا بننتج زيادة، كان في ناس بييجوا يأخدوا العيش عافية، ولو ماطلعتش تضرب، وكانوا بيعملوا مشاكل، فالمنظومة الحمد لله حلت 90% بالنسبة للبياع اللي كان كل يوم بيتشتم وبيتبهدل.. بس في كروت مش بتشتغل، على الماكينة، والبطاقة الورقية برضه مش شغالة على الماكينة".


 

وقال محمد "اللي حصل معانا أول يومين كان في تدافع وزحمة بس دلوقتي الحمد لله شغالة معانا كويس، أينعم ممكن تبقى زحمة بس احنا وفرنا عن الأول في الدقيق والغاز، الأول كنا بنعمل طن ونص ماكانش بيكفي لأن في ناس كانت بتتاجر بيه إنما دلوقتي أحسن".

  • تعليقات فيسبوك
  • اعلان