رئيس التحرير: عادل صبري 11:49 مساءً | الأحد 09 ديسمبر 2018 م | 30 ربيع الأول 1440 هـ | الـقـاهـره 20° صافية صافية

بالصور .. أهالي بطن البقرة: بنبص ع اللحمة ونقولها نشوفك في الجنة

بالصور .. أهالي بطن البقرة: بنبص ع اللحمة ونقولها نشوفك في الجنة

تقارير

منطقة بطن البقرة

بالصور .. أهالي بطن البقرة: بنبص ع اللحمة ونقولها نشوفك في الجنة

كتبت : نورا ناصر 21 يوليو 2014 14:28

منازل مبنية بالخشب والصفيح وأخرى بالطوب الأحمر.. أكوام القمامة تسيطر على المشهد ومياه المجاري تحيط المنازل.. حياة شاقة للغلابة.. ووكر لتجار المخدرات، خاصة وأنها في قلب الجبل.. أهالي المنطقة يعيشون وسط الثعابين والعقارب... إنها منطقة "بطن البقرة" بمصر القديمة والتي يعيش فيها أكثر من 3000 أسرة معظمهم يكسبون رزقهم يومًا بيوم.

تجولت كاميرا " مصر العربية " داخل المنطقة لترصد معاناة أهالي المنطقة .

 

 

في البداية تقول أم حسين : "أنا قاعدة في بطن البقرة من 23 سنة مفيش ولا ميه ولا مجاري ولا مستشفيات، حتى رغيف العيش بنجيبه بربع جنيه وصغير جدا، ومفيش مدارس العيال بتيجي تعدى الطريق العمومي علشان تروح المدرسة بتخبطهم العربيات وبتحصل حوادث كتير، ومعندناش مجاري عندنا " طرنشات " ولما تيجي العربيات تنزح الطرنش بتاخد 100 جنيه والمنطقة كلها حشرات وثعابين وعقارب، امبارح كنا قاعدين لقينا ثعبان داخل البيت" .

وتتابع أم حسين : "الحكومة معملتشي حاجه من 30 سنة" بتقول تطوير ومفيش جديد الحكومة هنا عندنا القسم لكن محدش بيجى يبص علينا أو يعملنا حاجه قالوا محمد صبحى بيلم فلوس علشان يطور العشوائيات ومشوفناش منهم أي حاجه أنا معايا 6 عيال بجيب قرض بـ1000 جنيه وبدفع 45 جنيه كل اسبوع وبييع شوية حاجات في دكانه صغيرة علشان أربي العيال".

وتستكمل حديثها قائلة : "أول حاجة عايزة من عبدالفتاح السيسي ينزل لنا ويشوف عشيتنا هو كان معدي من هنا لما راح يحلف اليمين في المعادي ياريته كان بص علينا، في ناس بتطلع وتكبر من هنا وناس مخفوسة في الأرض" .

وتشير أم حسين :" ان كيلو اللحمه بـ70 جنيه في الجيارة ، احنا مابناكشلي اللحمة، حتى كيلو الفراخ 20 جنيه والوراك غليت وكل حاجة غليت أجيب منين لحمة لـ6 عيال حتى زجاجة الزيت بـ20 جنيه ".

 

 

ويقول محمد العسيوي : "الحكومة مش وراها حاجة غير أنها بتاخد الناس اللي مالهاش ذنب، هنا مشاكل الناس كلها بتنحصر في انعدام الصرف الصحي ومفيش أي رعاية صحية حتى للأطفال، احنا مش بتوع مظاهرات ولكن احنا بناشد المسئولين وبنطالب المهندس محلب أو الرئيس السيسي أن يهتم بأهالي المنطقة الطرانشات داخل البيوت والرائحة وحشة جدا، ومعظم أهالي المنطقة يعانون من مرض فيروس سي والفشل الكلوي بسبب المياه الملوثة بالإضافة إلى انتشار الحشرات السامة مثل العقارب والثعابين ".

ويقول بدر عويضة أحد شباب المنطقة : "انا متعملتش عشان كل حاجة في التعليم بالفلوس ماخدتش دروس مش هتنجح ولا هتوصل، حتى الوظائف لما اروح يقولولى انت معاك شهادة ايه، منطقة بطن البقرة هنا مفيهاش مدارس نسبة الأمية هنا 70%، وبعدين المعيشة هنا مش مساعدة على التعليم، قائلا : "احنا اللحمة بنشوفها بنقولها نشوفك في الجنة" إحنا بنطالب المسئولين بالنظر إلى العشوائيات لتطويرها .

 

وتقول نوراة محمد أنا قاعدة في أوضة وشغالة في الزبالة، ومعايا 3 بنات عايزة أعمل أي حاجة أسعد عيالي، المشاكل حشيش وبرشام وضرب نار، والنور بيقطع 3 ، 4 مرات في اليوم وابنى لما قرصته عقربة ما فيش مستشفى تلحقه.

 

 

 

  • تعليقات فيسبوك
  • اعلان