رئيس التحرير: عادل صبري 07:04 صباحاً | الثلاثاء 13 نوفمبر 2018 م | 04 ربيع الأول 1440 هـ | الـقـاهـره 26° صافية صافية

سائقو وركاب أبوقير: وزير النقل ما يعرفش حاجة في القطارات

سائقو وركاب أبوقير: وزير النقل ما يعرفش حاجة في القطارات

تقارير

الزيارة التفقدية للمهندس هاني ضاحي وزير النقل والمواصلات

راح سيدي جابر المكيفة وتجاهلنا

سائقو وركاب أبوقير: وزير النقل ما يعرفش حاجة في القطارات

رانيا حلمي 13 يوليو 2014 11:27

"الوزير عمل إيه؟ جه نزل من العربية وركب العربية" هذا كان تعليق عبد الهادي منصور، سائق بقطار البلد "أبوقير" بالإسكندرية، على الزيارة التفقدية للمهندس هاني ضاحي وزير النقل والمواصلات، لمحطة قطار سيدي جابر المكيفة أمس السبت, واصفا أنه تجاهل ما يعانيه عمال قطار أبي قير.

ووصف منصور الجرارات- خلال رحلة مصر العربية داخل القطار- بأنها غير صالحة للاستهلاك الآدمي، قائلا: "الجرارات دي عمرها 36 سنة, وعمرها الافتراضي 25 سنة, مفيش صيانة للجرارات ولا في إشارة من الإشارات اللي في الطريق شغالة".

وأكد منصور أن عددا كبيرا من العاملين بالهيئة "سائقين, كمسرية" يعملون بمهن أخرى حتى يستطيعوا تلبية احتياجاتهم، فقال "مرتبي 750 جنيها وبشتغل عجلاتي بعد الشغل".

 

وعلق سائق آخر قائلا: "بناخد حافز في الرحلة رايح جاي من إسكندرية لأبو قير 6 جنيهات, ومفيش صيانة ولا قطع غيار, ومش بنشوف السنافورات ده غير الزبالة اللي موجودة والعيال اللي بياخدوا مخدرات"، مطالبا بإزالة التعديات الموجودة على طول الخط.

 

وقال أحد مهندسي الصيانة - رافضا ذكر اسمه- "الوزير جاي من شركة بترول, وما يعرفش حاجة في القطارات والنقل, حيعتمد على كلام المستشارين"، مضيفا "بره لغوا القطارات اللي بتشتغل بالطريقة دي, القطارات كلها بالكهرباء دلوقتي, حتى كندا اللي كانت بتصنعلنا القطارات وقفت صناعتها, وعملولنا إحنا خط إنتاج خاص لقطع الغيار, وبالتالي بيكون السعر مضاعف".

وأثناء مرور القطار بسور مطلي حديثا قال "كل ده عملوه وقالوا إن الوزير جاي, وما جاش, راح محطة سيدي جابر ومشى من هناك".

 

بينما قال محمد السيد، سائق: "المشكلة إن مفيش أمن خالص, وده بيسبب حوادث كتيرة, وحصل قدام عيني إن حرامي شد شنطة واحدة, وهي وقعت تحت القطر وماتت, ده غير إن في بعض المحطات بيطلعوا يفتحوا السرعات على أعلى سرعة وده حصل في محطة باكوس مرتين, ومحطة فيكتوريا, وكل اللي بنقدر نعمله أننا نعلق السارينة, كل ده علشان مفيش أمن".

وعلى رصيف 1 بمحطة مصر تجمع عدد من "الكمسرية", وقال سامح خليل، كمسري، إن أهم مشكلات خط أبي قير تتلخص في الأمن والباعة الجائلين، مضيفا: "أول حاجة الشرطة مش بتشتغل معانا في السكة الحديد, دول بياكلوا ويشربوا وبس, ده غير أن البياعين بيضايقوا الناس".

 

وقال كمسري آخر- رفض ذكر اسمه - معلقا على قطارات خارج المدينة: "الاستوكات بايظة, شوفي قطر 688 المناشئ, و128 إيتاي البارود, و654 مطروح, شوفي الاستوكات غير صالحة تماما".

وعن خط أبي قير قال: "كل يوم بنتعرض للسرقة والركاب كمان, أكتر من 20 سرقة في اليوم من موبايلات وشنط, وزميلنا بهاء الجوهري اتضرب بمطواه وماحدش جابله حقه"؛ ومعقبا على أداء شرطة المحطة "ده لو حد اتسرق مش حتقدري تعمليله محضر".

وقال كمسري آخر: "البياعين ممنوعين رسميا من القطارات وبيشتغلوا وده تقصير من الشرطة".

 

كما رصدت "مصر العربية" مشاجرة بين أحد الباعة الجائلين وراكب أثناء نزولهم إلى المحطة, وحين توجهوا إلى شرطة المحطة تم إطلاق سراحهم دون اتخاذ أي إجراء، وعلق العاملون على المشهد قائلين "أديكي شوفتي بعينك, إذا كان بيسيبوهم حيجبولنا حقنا؟".

وقال وليد حنفي، كمسري: "المنتزه والإصلاح والظاهرية أكتر المحطات اللي بنتعرض فيها للخطر، والمفروض يكون مع كل قطر طالع حرس, لكن هنا الحراسة بتطلع بالطلب".

 

وعن زيارة وزير النقل علق بعضهم قائلا: "بيقولوا جه بس ماجاش عندنا هنا, وماشوفناهوش, هو في حد بيجلنا؟ إحنا مانعرفش رؤساء الأقسام بتاعتنا مين."

 

وقال فتحي توفيق إنه وغيره قد تعرضوا للسرقة أكثر من مره دون وجود رد فعل من الشرطة، مضيفا: "بيطلعوا علينا بسلاح واتثبتت قبل كده في محطة "السماد" بعد الطابية وكانت الساعة 4 العصر, استنجدت بالداخلية، ظابط المباحث كلمني وقالي حنجيلك وماحدش عبرني".

وعن عدد الرحلات المقررة في اليوم لكل منهم قال أحدهم:"المفروض نطلع رحلتين رايح جاي, في الغالب بنطلع رحلة واحدة وبنقعد 6 ساعات وكل ده من غير بدلات".

وقال "توفيق": "بيتخصم مننا 5% إثابة لصالح مجموعة في الهيئة, وبيتخصم مننا 20% ضرائب على الحوافز, في الوقت اللي المهندسين ما بيتخصمش منهم حاجه".

وأضاف: "في قطر بيطلع لصالح مصنع فرج الله رقمه 4222 بيطلع فاضي الإيراد بتاعه 8 جنيه في اليوم, وبيشتغل علشان بيطلع عليه حوافز للمهندسين والشرطة, ما يجيبوه يشغلوه هنا".

 

وأشار وليد حنفي، أحد العاملين، إلى أن عدد القطارات الموجودة على خط أبي قير غير كافٍ خاصة عقب زيادة سعر البنزين, حيث زيادة الإقبال على القطارات من قبل غير القادرين.

وأضاف: "الخردة بتاعة السكة الحديد بتتسرق وبلغنا الشرطة قالوا مش عارفين نعملكم حاجة".

 

كان المهندس هاني ضاحي، وزير النقل، قد تفقد محطة قطار سيدي جابر بصحبة محافظ الإسكندرية اللواء طارق المهدي أثناء زيارته أمس السبت.

 

اقرأ أيضا

  • تعليقات فيسبوك
  • اعلان