رئيس التحرير: عادل صبري 05:02 مساءً | الأربعاء 19 سبتمبر 2018 م | 08 محرم 1440 هـ | الـقـاهـره 36° صافية صافية

يعنى إيه بنت بتسوق فى مصر!

يعنى إيه بنت بتسوق فى مصر!

المرأة والأسرة

سواقة البنات

يعنى إيه بنت بتسوق فى مصر!

سمية الجوهرى 23 فبراير 2015 12:29

الحقيقة وبكل صراحة ماكنتش أتوقع أن أكتب موضوع عن السواقة بأي شيء يخصها إلا لمّا جربت السواقة بنفسي وعرفت أسوق زي بقية الخلق وأتعامل مع كل أصناف البشر من خلال مواقف السواقة ..

 

رأي مختلف :

وكانت الحقيقة اللى كنت مصدقاها على رأى معظم الرجالة فى سواقة البنات كانت متجسدة فى المثل ده   "لا تمشى ورا أتوبيس هيئة ولا ست سايقة " وكنت لما بقعد بجانب جوزى أو والدى دايما وهما بيسوقه وبنلاقي أى عربية موقفة الطريق أو مش عارفة تركن أو تتصرف فى موقف معين أسمع كل الناس تقول "هاتلاقى اللى سايقة دى واحدة ست " لحد ما قررت إنى أسوق وأدخل عالم السواقة بنفسى ..واكتشفت على عكس كل الناس إن لسواقة البنت مميزات كتيرة ماحدش يعرفها ومن أهمها :

 

مميزات سواقة البنات :

1- بتحترم اللى جاى مُخالف : الحقيقة ان لو راجل سايق ولقى راجل تانى جاى فى وشه مخالف بينزل من عربيته ويقعد يتخانق معاه وخصوصا لو التانى مادهوش فرصة انه يعدى الأول برغم انه هوا اللى غلطان والطريق كله بيقف وراه..لكن لو بنت لاقت عربية فى وشها جاية مخالف "من خضتها بتضطر تقف بعربيتها وترجع كمان كذا خطوة لحد مالسواق المخالف يعدى براحته وياخد فرصته وتروح مكمله طريقها بعد كده عادى بدون خناق ولا تعطيل مرور ولا حاجة "

 

2- بتلتزم بقواعد المرور : لو لاقيت عربية قدامك مستخدمه الإشارات بتاعتها قبل الهنا بسنة ..يعنى قبل ماتدخل يمين تلاقيها ملتزمة بيمينها جدااا ومديه إشارة اليمين قبلها بفترة وملتزمة باشارة الانتظار فى كل مكان بتقف فيه..يبقى اكيد اللى سايقة واحدة ست

 

 

3- وراء كل شخص بيعدى الطريق براحته..بنت سايقه  : لأن المرأة بطبيعتها عاطفية غير الرجل تلاقيها بتحس بالناس اللى ماشية على رجليها وبتديهم فرصة كافية انهم يعدوا براحتهم وبأمان وبتقف تستنى كل اللى ماشى يعدى حتى لو هاتوقف الطريق وراها ..يعنى بتحس بالناس اللى ماشية

 

4- مش هاتلاقى عربية عطلانة ومعطلة الطريق :لو راجل عربيته عطلت ممكن ياحبة عينى اديه تتشل من كتر مابقاله ساعة بيشاور لأى عربية تقفله وتساعده فى عربيته اللى عطلت وخاصة لو كان على السريع وأحيانا الطريق يقف كله من العربية العطلانة دى والناس تتعطل..وممكن تفتكرها أصلا حادثة موقفه الطريق..لكن لو بنت عربيتها عطلت مش محتاجة أقولكم الكل بيعمل معاها ايه بدون ماتشاور حتى ..

 

5- بتقلل حوادث الطرق :الحقيقة أن سواقة البنات بتقلل حوادث الطرق على عكس الشباب اللى قلبه ميت وبيجرى بعربيته ومابيهمهوش إشارات ولا ردار ولا بنزين بيتحرق ولاغيره.. لكن البنت من حسها الخوفى والأمنى طبعا تلاقيها بتتبع كل قواعد المرور ومابتزودش سرعتها عن الحد المعقول وبتترك مسافة كافيه بينها وبين العربية اللى قدامها ومابتتخطاش أى إشارة غير حبها لحزام الأمان وكأنه عيل من عيالها ..

 

6- بتوفر البنزين : لأن أغلب البنات بتوفر حق البنزين من مصروفها الشخصى أو مصروف البيت لو كانت متجوزة فاتلاقيها بتمشى بهدوءءء وبتحافظ على سرعتها ظناً منها إنها بكده بتوفر البنزين زى مابتحافظ على تموين البيت الشهرى كده..

 

 

7- ماتلاقيش الرخصة مسحوبة : كفاية أوى دمعتين قدام الظابط وإنها لازم ترجع برخصتها ورخصة العربية لا جوزها يعمل معاها مشكلة ويتهمها بالاستهتار ويمكن يطلقها كمان والعيال يتشرده وبكده هايبقى الظابط هوا المسؤول عن التشرد الأطفالى اللى فى البلد..فاتصعب على الظابط ويضطر يسبلها رخصتها تروح بيها

 

8- بتستغل كل مرايات العربية : طبعا الرجالة بتسوق ببركة دعا الوالدين حتى بدون مابيستخدموا كل مرايات لكن البنت مابتفوتش حاجة غير لما بتستغلها الاستغلال السليم.. يعنى المراية الأمامية بتظبط فيها الميكب بتاعها ..والمراية الجانبية بتعدل فيها حجابها أو شعرها ..

 

9- فاتحه بيوت ناس كتير : من ميكانيكية وسمكرية وكهربائية "خبطة من هنا على تجريح من هنا " ده غير بتوع إكسسوارات العربيات لتزيين عربيتها بالكامل  "وهنيالك يافاعل الخير والصواب "

 

10- وأخيرا : بتحافظ على الأخلاق العامة : لو لاقيت عربية اتخبطت وماحدش ظهر منها ولا شتم ولا اتخانق وطول إيده ..يبقى إنت أكيد دخلت عالم سواقة البنات..لأن البنت حتى لو عربيتها اتخبطت مابتشتمش..ولا واحد غلط فيها تقوله المسامح كريم ...ولو بجح اوى بقى وهوا اللى غلطان وطلب تعويض فى حاجه انكسرت  عنده وبسببه ..يمكن كمان تطلعله كل الفلوس اللى فى شنطتها وتديهاله حفاظا على الأرواح والأخلاق العامة وعملا بمبدأ "اقصر الشر وغنيله "

اقرأ أيضا: 

  • تعليقات فيسبوك
  • اعلان