رئيس التحرير: عادل صبري 10:48 صباحاً | الثلاثاء 16 أكتوبر 2018 م | 05 صفر 1440 هـ | الـقـاهـره 28° صافية صافية

مراتك عصبية.. "الرحمة حلوة مافيش كلام "

مراتك عصبية.. الرحمة حلوة مافيش كلام

المرأة والأسرة

عصبية ولسانها طويل

مراتك عصبية.. "الرحمة حلوة مافيش كلام "

سمية الجوهرى 11 يناير 2015 07:49

على الرغم من شكوى الكثيرات من عصبية أزواجهن.. فهذا يغضب وذلك يثور وآخر يسب ويلعن ويتحكم.. إلا أنى اكتشفت أيضًا أن هناك قاعدة كبيرة من الأزواج يشتكون معاملة زوجاتهم لهم.. وخصوصا إذا كانت زوجة "عصبية وعنيدة ".

 

كائن مزعج

فعندما سأل زوجى أحد أصدقائه الذي لا يفارق القهوة تقريبا عن سبب مكوثه طويلا خارج البيت.. فرد عليه صديقه قائلا: "هربان من البيت" وأضاف: "أصل الست لما تتحول من أنثى هادية لكائن مزعج.. ماتبقاش عيشة دى اللى الواحد عايشها.. على طول عصبية وقرفانة والأهم من كده إن مراتى لسانها طويل.. ولولا الولاد كان الواحد طلقها وخلص".

 

لا أحبها

وقد اشتكى آخر لأحد المستشارين الاجتماعيين قائلا: "مراتى عصبية ونكدية ولسانها طويل ومتحكمة وده بيموت الحب جوايا من ناحيتها.. ده أنا حتى بقيت مش قادر أعطف عليها ولا أكون ودود معاها بسبب طباعها العصبية والنكدية دى وخاصة لسانها الطويل..".

 

رصيد الحب انتهى

تعلق د.دعاء راجح الاستشارية الأسرية والتربوية من خلال صفحتها نصيحة من القلب قائلة: عندما تفقد المرأة أنوثتها بالعصبية والعند واللسان الطويل.. تفقد رصيدها بالتدريج في قلب شريك حياتها كما تفقد أيضًا تعاطفه معها وليس الحب فقط".

 

طرق التعامل معها:

وقالت ناصحة الأزواج: "لو مراتك لسانها طويل وحابب تستمر معاها لأى سبب يبقى عليك إنك تتعامل معاها بالطرق التالية ":

 

1- لو مقدرتش تحبها يبقى على الأقل ماتفقدش الرحمة معاها

2- لو مش قادر تحس بالرحمة ناحيتها.. . تصنع الرحمة كنوع من المجاهدة النفسية.. الرسول بيقول إنما الصبر بالتصبر والحلم بالتحلم.

3- افعل بعض الأعمال التي تدل على الرحمة حتى لو مش نابعة من جواك.

4- ساعدها في بعض أعمال المنزل أو على الأقل اخدم نفسك بنفسك 
تعلق هدومك وتضع الحذاء في مكانه وتضع غير النظيف في سبت الغسيل.. تعمل لنفسك كوباية الشاى.. اكوى هدومك. اعمل لنفسك ساندوتش الصبح.. مجرد انك تشيل نفسك دا ممكن يخف عنها الضغط اللى عليها شوية ويحسسها بتعاطفك ورحمتك بيها.

 

ارحم ولادك قبل مراتك

5- لما تلاقي البيبى بيعيط شيله بدل ما تنده لها.. حاول تسكته.. وياسلام لو قعدت ترضعه من الببرونة أو تأكله.. وفيها ايه لو غيرت له أو تنيمه .. دا رحمة بولادك قبل ما يكون رحمة بيها .

 

6- أولادك مالهمش ذنب يفتقدوك علشان انت مش طايق أمهم.. ،.وهما مش ذنبهم عشان مش طايق أمهم إنك تهرب بره البيت وتسيبهم هما كمان.. لما تلاقى ابنك بيسأل عن حاجة في المدرسة اسمعه وجاوبه وممكن تعد معاه وهو بيعمل الواجب.. اقعد مع ولادك.. لأن عصبيتها وطولة لسانها هتكون معاهم برضه.. إنقذهم من سوء تربيتها لهم.. ركز مع ولادك وانت في البيت.. ولادك دول مسؤوليتك

 

7- لما تكون تعبانة ومريضة حاول تطبطب عليها وتقولها كلمة طيبة وتجيب لها الدوا وسيبها ترتاح وقل لها هجيب اكل من برة

 

الهروب ليس الحل

وتختتم د.دعاء راجح حديثها قائلة:عزيزى الزوج.إوعى تفقد رحمتك لو فقدت حبك.. الرحمة دليل على إنك لسه إنسان ولسه عندك قلب بيحس.. وإن فقدت الرحمة حاول تعبر عنها بتصرفات عملية علشان توجدها.. لكن الهروب ليس الحل بل يزيد المشكلة سوءا

 

  • تعليقات فيسبوك
  • اعلان