رئيس التحرير: عادل صبري 09:28 صباحاً | الثلاثاء 23 أكتوبر 2018 م | 12 صفر 1440 هـ | الـقـاهـره 33° صافية صافية

عزيزى الرجل.. سديت نِفس مراتك

عزيزى الرجل.. سديت نِفس مراتك

المرأة والأسرة

الراجل مش بس بكلمته

عزيزى الرجل.. سديت نِفس مراتك

سمية الجوهرى 18 ديسمبر 2014 08:10

عزيزى الزوج.. فاكر إعلان أحمد ماهر بتاع تنظيم الأسرة زمان.. فاكر الجملة الشهيرة اللى كان بيقول فيها "الراجل مش بس بكلمته الراجل برعايته لبيه وأسرته"، فاكر الإعلان ده ولا إتمحى من ذاكراتك خلاص.. لأنك بقيت من رواد مدرسة الراجل بكلمته وزعيقه لمراته وأسرته.

رجولة مزاجية

 المدرسة اللى بتخرج شباب زى الفل دلوقتى.. اللى هم كل واحد فيهم إنه يتجوز ويعمل راجل على مراته.. ما تلبسيش ده.. ما تكلميش فلان الفلانى.. إمسحى صورك اللى على الفيس.. ابن خالتك ما يدخلش عندنا البيت عشان الغيرة وكده.. ولما تيجى تقولك طيب يا حبيبى عايزاك تجبلى كذا وكذا معاك من السوق وإنت جاى، فترد عليها وتقولها ما تنزلى تجيبى إنتى، "هو إنتى اتشليتى يا حبيبتى"، أمال فين بقى الرجولة اللى بترسمها عليها، والغيرة ومش عارف إيه، ولا هى رجولة مزاجية، أوقات وأوقات !

كلامك الجارح

ومن قوانين المدرسة دى: إنك تتجوز مراتك وردة مفتحة وتسيبها لحد ما تتبدل بإهمالك ليها وجفافك العاطفى معاها.. وكتر طلباتك وطلبات عيالك اللى ما تخلصش لحد ما بتتحول من ست البنات الفاتنة اللى جذبتك أيام الخطوبة لست النكديات اللى طول النهار  نفسها مسدودة  بسببك وبسبب كلامك الناشف معاها.

رجل الأنياب المبوزة

عزيزى الزوج الدكر.. فعلا إنت اللى سديت نفس مراتك.. سديت نفسها بأسلوبك الخالى من أى كلمة حلوة ومن أى كلمة شكر على كل اللى بتعمله ليك.. سديت نفسها لحد ماخلتها تنسى لبس الدلع وتلبس لك على طول جلاليب واسعة تناسب شغل البيت اللى ما بتفكرش يوم تقوم تساعدها فى حاجة فيه وتريحها كده، وتحس إنها واخدة أجازة زى مانت كمان بتاخد أجازة بالظبط من شغلك.. سديت نفسها بعيونك الزايغة وكلمتك الشهيرة اللى بتقولها كل مابتتفرج على التلفزيون  "شوفتى المزز"، آدى الستات ولا بلاش، وكأنك متجوز توفيق الدقن.. سديت نفسها ببوزك اللى ملوى معاها طول مانت قاعد فى البيت وأول ما أصحابك يكلموك تنزل ضحك وهزار وتتحول لراجل كوميدى وكيوت، وأول ما تقفل التليفون مع أصحابك تتحول تانى فجأة  لرجل الأنياب المبوزة.

عزيزى الزوج.. خلى بالك من مراتك واهتم بيها عشان هى كمان تهتم بيك وتهتم بنفسها.. اشكرها على حاجة حلوة بتعملها.. قولها كلمة رومانسية تدوبها فيك.. اعملها مفاجأة وفرح قلبها اللى عايش عشانك وعشان راحتك.

صوتك العالى دليل على ضعف موقفك

تعلق مدربة التنمية البشرية والاستشارية الأسرية والتربوية سارة ممدوح قائلة: عزيزى الزوج صوتك العالى عمره ما كان دليلا على رجولتك، فلقد أكدت بعض الدراسات التى أجريت حول نظرة المرأة إلى الرجل صاحب الصوت العالى وزعيقه داخل المنزل أن المرأة تنزعج من الصوت العالى، وقد يصيبها حالة قلق وتوتر من هذا الصوت، وغالبا ما تصل إلى أنه عند دخول الزوج المنزل تصاب هى بالتوتر من أقل كلمة منه، خوفا من صوته العالى، ودائما فى أى نقاش إذا ارتفع الصوت أو تحركت اليدان فاعلموا جيدا أن هذا الإنسان ضعيف الشخصية وحواره لا جدوى منه.

افهم وجهة نظرها

وتتابع ممدوح قائلة: يفاجأ الرجل كثيرا عند دخوله المنزل بأن زوجته تتحدث بإسهاب عن تعبها في ملاحقة الصغار لتنظيفهم، وعن تعبها من تحمل المسئوليات الخاصة بالمنزل، تتحدث عن هذا كله وأكثر بصوت حزين ملىء بالشكوى والتذمر، وطبعا الزوج المسكين يظن أنها تتهمه بالتقصير، هنا يحدث الخلاف وعدم التواصل، فيلجأ هو إلى أحد أمرين، إما أن يرد على الهجوم الشرس من ناحيتها بالدفاع عن نفسه، أو يترك لها المنزل ويخرج، ومرة بعد أخرى ينقطع التواصل بالأحاديث بينهما، وتتسع الفجوة، وتسد نفسها، وهنا نقول من فضلك افهم وجهة نظرها، من فضلك افهمى وجهة نظره.

خفف عنها وفاجئها

وتختتم الاستشارية الأسرية سارة ممدوح حديثها للزوج قائلة: عزيزى الرجل.. هى تتحدث عن مصاعب يومها معك للتخفيف عن نفسها فقط؛ لأنها تدرك أنك المسئول الكامل عنها وأنت وحدك من تستطيع تخفيف آلامها، مطلوب منك ألا تقاطعها أثناء التحدث معك، وهى تحكى فقط لمجرد التخفيف، ولا تريد منك نصيحة، هى تريد أن تسمعها وتهتم لحوارها، ممكن كلمة حلوة منك تنسى بها هم اليوم كله.. ممكن تفاجئها بهدية حتى لو كانت صغيرة، هى مش بتحسب الهدية بقيمتها المادية، هى بتحسب الهدية مهما كانت بأنك فاكرها، وحبها فى قلبك بيزيد، وبتعتبرها نوعا من الاهتمام اللائق بها، ممكن لو جبت لها وردة هتبقى طايرة من الفرحة بها، لأنها منك.. لما تفاجئك هى بحاجة قل لها كلمة حلوة بلاش تسد نفسها وتعاملها كأن مفيش مفاجأة هى عملتها لك.. أنت تعبان فى شغلك وهى كمان تعبانة فى شغل البيت وتربية أولادك اللى هتفتخر بهم فى حياتك بعد كده أمام أسرتك وعائلتك.

اقرأ أيضا:

  • تعليقات فيسبوك
  • اعلان