رئيس التحرير: عادل صبري 07:23 صباحاً | الاثنين 24 سبتمبر 2018 م | 13 محرم 1440 هـ | الـقـاهـره 34° صافية صافية

بـ 10 طرق رومانسية "قوم عيد على مراتك "

بـ 10 طرق رومانسية قوم عيد على مراتك

المرأة والأسرة

الهدية تسعد الزوجات

بـ 10 طرق رومانسية "قوم عيد على مراتك "

سمية الجوهرى 04 أكتوبر 2014 08:08

عزيزى الزوج اللى أخدت أجازتك خلاص وقررت تعيد وتنبسط وتفرح بالعيد كده..ماتنساش تفرح مراتك معاك..وقوم كده عيد عليها واعتبرها زى بنتك  برضه ..

هاتقولى هو حد بقى لاقى ياكل فى الأيام دى عشان يعيد على مراته..ساعتها هارد عليك واقولك العيدية مش لازم تكون فلوس..ممكن تعيد عليها بطرق تانية بسيطة و رومانسية  وابقى اسمك افتكرتها وعيدت عليها بطريقتك ..والطرق الرومانسية كتيرة وخصوصا فى العيد ومنها :

 

                                                                                            للعيدية قواعد وفنون

 

1- اولا العيدية مش مرتبطة بكم الفلوس "العيدية ممكن تكون حاجة رمزية لكن تفرحها جدا..يعنى لو 20 ج جديدة حطتهلها فى ظرف وكتبت عليه كلمة كل سنة وانتى طيبة  او بحبك هاتبقى عندها بالدنيا ومافيها


2- زى مانت أخدت أجازة من شغلك وقررت أنك تفصل من الروتين اليومى وتريح دماغك شوية هى كمان من حقها تاخد أجازة شوية من شغل البيت وتفاصيله اللى ماتخلص..يعنى ممكن تكون عيديتك ليها انك تساعدها فى تحضير الأكل فى العيد او إنك تقولها تانى يوم العيد ماتدخليش المطبخ خالص وانا هاتصرف وانت ومقدرتك بقى ..اللمسة دى عندها هاتبقى احسن من اى عيديه


3- حضرلها مفاجأة غير متوقعة: وتبقى هى دى العيدية بالنسبالها زى مكان كان نفسها تروحوا مثلا..فيلم كانت حابها تدخلوا معاك سينما يعنى أى حاجة كانت نفسها فيها ومش متوقعه انك فاكرها..فاقوم حضرها ليها وتبقى بكده عيدت عليها


4- اشترى ليها هدية خاصة بيها: زى بيبى دول او علبة ميكب حتى لو كانت صغيرة او إزازة برفان على ذوقك ولفها لفة حلوة فى شنطة  شيك ..لأن الهدايا من النوع ده دى بتفرح الست جدا وبتحس بحب جوزها ليها


5- خفف الطلبات عنها:عادة الزوج لما بياخد الأجازة ويقرر يقعد فى البيت أول واحدة بتعانى هى مراته..لأنه ساعتها مابيبطلش طلبات مرة هاتيلى كوباية ميه ومرة اعمليلى فنجان قهوة ومرة اكويلى القميص ده بعد ماتكون حضرتلك واحد تانى لحد مابتخليها تكره يوم أجازتك..لكن انت فى العيد معلش تعالى على نفسك وغير العادة اللى اتعودت عليها دى وخليها تحس انها كمان مرتاحة زى مانت مرتاح كده .ولو عايز حاجة مرة هى تعملهالك ومرة تقوم انت تعملها لنفسك...صدقنى هاتحس بالفرق جدا والأهم إنها هاتحس بأجازة العيد

 

                                                                                                      هاتعيد بحبك ليها

6- بدل ماتسهر مع أصحابك بليل على الكافيهات والقهاوى ..حضر ليها سهرة حلوة فى البيت فى ايام العيد حتى لو هاتقعد تعلمها البلاي ستيشن وتلعب معاك وتسبها تغلبك مع شوية تسالى وعشا حلو ..هاتعمل جو من التغيير وكسر الروتين وتحس وقتها ببهجة العيد


7- ماتكسرش بخاطرها:لو طلبتك منك طلب معين وانت رافضه حاول تيجى على نفسك وتحقق ليها الطلب ده وماتكسرش بخاطرها واعتبره أوفر فى العيد انك مش هاترفض طلابتها وهاتحول تنفذ اللى تحبه على قد ماتقدر وبكده هاتكون عيدت عليها نفسيا بأجمل عيدية


8- اهتم بأهلها:عادة الزوج فى العيد بيحب يقضى اغلب الأوقات مع أهله ووالدته ووالده وأخواته وممكن يجى على أهل مراته ويقصر معاهم فى زياراتهم وتحس الست فى الآخر انها قضت معظم العيد مع اهله ومش مع أهلها..فاهتم بأهلها واعرف ان من حقها إنك تقضى وقت مع أهلها معاها زى مابتكون معاك وانت مع اهلك..وده هايحسسها باحترامك لمشاعرها وتقديرها


9- مسئولية أولادك : مراتك طول الوقت متحملة مسئولية اطفالك فى البيت..فاعتبر العيد فرصة إنك تشيل عنها المسئولية دى شوية وخد من الأجازة وسيلة للترفيه عنها بإنك تتحمل مسئوليتهم ومساعدتها فى طلباتهم خصوصا لو كانوا لسه أطفال صغيرين محتاجين عناية كل لحظة.


10- وأخيرا واهم خطوة إنك تقلل من قعادك على النت او الموبايل طول مانت قاعد فى البيت وحسسها بوجودها معاك وإنك قاعد مهتم بيها هى وبتتكلم معاها مش مشغول طول الوقت على النت وحاطط وشك فى وش الموبايل 24 ساعه..

 

وبكدة عزيزى الزوج هاتقدر توصل لمراتك بطرق كتير عيديتها عن طريق تقديرك وشعورك وحبك ودعمك ليها ..فامتترددش وقوم عيد على مراتك بطريقتك الخاصة او بأى طريقة تقدر تعملها من الطرق اللى فاتت.

 

 

 

  • تعليقات فيسبوك
  • اعلان