رئيس التحرير: عادل صبري 07:31 صباحاً | الثلاثاء 25 سبتمبر 2018 م | 14 محرم 1440 هـ | الـقـاهـره 34° صافية صافية

انتبه.. مراتك ترجع إلى الخلف.. وهاتتقفش متلبس

انتبه.. مراتك ترجع إلى الخلف.. وهاتتقفش متلبس

المرأة والأسرة

شكلك لما مراتك تقفشك

بتلعب بديلك..

انتبه.. مراتك ترجع إلى الخلف.. وهاتتقفش متلبس

سمية الجوهرى 31 أغسطس 2014 12:01

عزيزى الزوج يوم ماتقرر إنك تلعب بديلك بره البيت وتخون مراتك بأى شكل من أشكال الخيانة حتى لو كانت بنظرة او إبتسامة أو مجرد دردشة على النت والفيس.. اعرف أكيد إنك مهما تعمل فالح وذكى إن مراتك كده كده هاتقفشك..ولو القفش ده ماجاش من الحاسة السادسة اللى بتتمتع بيها كل ست مصرية أصلية تجاه جوزها.. هايبقى من شوية خطوات كده بتستعملها الستات دلوقتى وتشغل فيها دماغها عشان تكشف عن طريقها خيانة جوزها ليه.. وأولها إنك هاتلاقيها بقت وراك دايما وبتراقب كل تصرف مريب منك.

واعرف كمان عزيزى الزوج إن كده كده أى بنت بتتجوز صاحبتها أو جارتها أو قريبتها محفاظاها الطرق دى..اللى تقدر تكشف بيها عيونك الزايغة بره البيت..ويصابت ياخابت..يعنى ممكن تطلع برىء فى الآخر وفى النهاية هايبقى الموضوع مجرد سوء ظن ..وممكن فعلا تتقفش وتطلع فى الآخر بتلعب بديلك..لكن اللى لازم تعرفه إنك هاتتحط تحت المراقبة الدولية فى بيتك ومن مراتك لحد ماتثبت براءتك وإنت وشطارتك بقى..ومن أهم 10 طرق لكشف خيانة الراجل لمراته واللى البنات والستات بينصحوا بعض بيها هى :

1- الموبايل واللى بيجى من تحت راسه..اعرف إنك يوم ماهتحطله كود سرى إنت بس اللى تقدر تفتحته وتخبيه عن مراتك ولو الجن الأزرق جرب الرقم السرى مش هايعرف..يبقى إنت كده دخلت أول دايره من دايره الشك ويبقى كده مراتك حطيتك فى قايمة اللى بيعب بديله..

2- التأخير بعد الشغل بشكل ملحوظ.. يوم ماهتتغير فى مواعيد رجوعك للبيت اللى إنت متعود عليها بعد الشغل وتحاول كل مرة تقولها حجة شكل..اصل صاحبى تعب ونقلناه المستشفى.. واحد صاحبنا باباه توفى وقاعدنا معاه طول اليوم..كنت بدور على هدية اشتريها ليكى بس للأسف كالعادة ياحبيبتى إنتى فقر ولاقيت كل المحلات قافلة..وحجج كتير من النوع ده..يبقى إنت كده لبست رسمى وهاتتقفش يعنى هاتتقفش

3- يوم ماترجع البيت وتعمل موبايلك صامت.. وتمر هى بالصدفة تلاقيه بينور..وتقولك إيه ده ياحبيبى إنت عامل موبايلك صامت ليه..فاترد بتوتر وتقولها إيه ده ياحبيبتى سبحان الله هوا بقى صامت مش عارف والله له فى ذلك حكم..فعلا سبحان الله برضه لأن موبايلك كده هايبقى دخل موسوعة جينس فى المراقبة كل ثانية واقل من الثانية كمان

4- الصمت المريب: لما تحب تعمل فيها راجل هادى وفجأة بقيت تعشق الصمت والهدوء يبقى ماتعملش كده فى بيتك وقدام مراتك اللى حافظاك صم وعارفه إنك رغاى ومابتحبش تسكت ثانية..لكن يوم ماتقعد ساكت ومتنح وسرحان وعمال تفكر والموضوع ده يتكرر كتير..يبقى اعرف ياعزيزى إن الست بحاستها العظيمة هاتعرف إن الموضوع فى واحدة ست..فايوم ماتحب تسرح اسرح فى الشغل وخالى مديرك بقى هوا اللى يقفشك..واهى تيجى من مديرك احسن ماتتقفش من مراتك

5- لما مراتك تقوم من النوم فى وسط الليل بالصدفة وتدور عليك ماتلاقكش جمبها وتلاقيك بقدرة قادر قاعد على الاب بتاعك او موبايلك وفاتح النت ومندمج اوى فيه..وتسألك ايه اللى مسهرك لحد دلوقتى.تقولها عادى ياحبيبتى مش جايلى نوم..إزاى ده إنت طول النهار صاحى وعينك كلها نوم..تروح ترد عليها والله غفلت شوية وفقت بعدها..آه يعنى بتعمل إيه برضه ومندمج فيه أوى كده..تقولها بتفرج على عالم الحيوان على النت..آه حيوان..قلتلى بقى طب وسع شوية كده إما أتفرج معاك أصل أنا كمان فقت والنوم راح من عينى..يبقى كده اتقفشت رسمى ووقعت وماحدش سمى عليك.

6- لو مِسكت موبايلك فى لحظة سهو منك..ماهو الإنسان بيسهو برضه مش كمبيوتر حضرتك..تروح متبرجل وراكبك 60 عفريت وتقولها اوعى تيجى ناحيته ولا تلمسى حاجة,, ده انا بعمل دونلود لبرنامج ومتعسف عشانه ماتبوظليش اللى بعمله..وطبعا مش محتاجة اقولك وقتها إن مراتك شكت فيك لأنها كده مش شكت بس دى إتأكدت من برجلتك دى إنك بتعلب بدليك وبتخونها كمان

7- يوم ماتعمل ناصح وتمسح على طول أول بأول البريد الوارد والصادر عندك على الميل او الموبايل او الرسايل عشان مراتك ماتكتشفشى حاجة..يبقى كده هى فعلا هاتكشفك لأنها هاتشك من نضافتك دى الأوفر اللى ماشاء الله ماسح كل حاجة ومنضفها أول بأول

8- المراوغه فى الكلام والكدب اللى بتتقفش بيه كتير وانك تتعمد تخبى حاجات زى فواتير الموبايل وأرقام التليفونات وإنك تسمى ناس بأسماء غريبة على موبايلك زى أبو هنادى مثلا.هوا حد بقى اسمه هنادى دلوقتى..وتصرفات من القبيل ده يبقى كده مراتك ركزت معاك اوى لحد ماتقع فى يوم من الأيام تحت إيديها

9- لو موبايلك رن فجأة وإنت قاعد جمب مراتك بتتعشى وتروح باصص عليه كده بتتوتر وتقولها ده واحد صاحبى مش عايز أرد عليه..تقوم هى حارجاك وتقولك هوا أنا سألتك..يبقى كده مبروووك عليك القفش رسمى يامعلم

10- وأخيرا لما تتظاهر إنك حران مع إن التكيف شغال وتقولها أنا داخل اشرب سيجارة فى البلكونة وتاخد معاك موبايلاتك الإتنين ..تقوم تقفشك وتقولك واخد الموبايل معاك ليه فتقولها والله ده انا افتكرته علبة السجاير .الواحد مابقاش مركز خالص..فعلا إنت مابقتش مركز خالص بس سبحان الله ربنا أخد من هنا ووصل منها وادى التركيز كله لمراتك اللى خلاص شغلت خاصية الإنتباه والتدقيق والتمحيص وكل حاجة من أجل هدف واحد بس إنها تقفشك وإنت متلبس فى عملية قفش كبيرة هاتكون محضرها ليك بإذن الله وبدون مقاطعة..

 

إزاى-تطفشى-جوزك-من-البيت">يوميات زوجة مستعبطة إزاى-تطفشى-جوزك-من-البيت">"إزاى-تطفشى-جوزك-من-البيت">إزاى تطفشى جوزك من البيتإزاى-تطفشى-جوزك-من-البيت">"

الرجالة ماتت فى الحرب خلاص

إزاى-تحرق-أعصاب-مراتك">عزيزى الزوجإزاى-تحرق-أعصاب-مراتك">.. "إزاى-تحرق-أعصاب-مراتك">إزاى تحرق أعصاب مراتكإزاى-تحرق-أعصاب-مراتك">"

حضرِة الزوج الكيوت "اعتبره زى ابنك برضه"

دعاء: قتلت زوجي لأنه بيلعب بديله

  • تعليقات فيسبوك
  • اعلان