رئيس التحرير: عادل صبري 05:10 صباحاً | الخميس 18 أكتوبر 2018 م | 07 صفر 1440 هـ | الـقـاهـره 28° صافية صافية

يوميات زوجة مستعبطة "إزاى تطفشى جوزك من البيت"

يوميات زوجة مستعبطة إزاى تطفشى جوزك من البيت

المرأة والأسرة

الزوجة النكدية

الجزء الأول

يوميات زوجة مستعبطة "إزاى تطفشى جوزك من البيت"

سمية الجوهرى 18 أغسطس 2014 07:35

مافيش أكتر من الستات اللى بتقعد تشتكى دلوقتى من الجواز وسنينه.. وكل واحدة بقت تشتكى من تصرفات جوزها اللى بقت غريبة.. اللى مابقاش يقعد فى البيت خالص.. واللى مابقاش طايق مراته.. واللى طفشان طول اليوم مع أصحابه.. واللى بيتخانق معاها على أتفه الأسباب واللى عايز يتجوز عليها تانى.. واللى بيفكر فى الانفصال.. واللى بقى طايق العمى ولا يطيق سيرتها.. وتيجى تسأل هوا بيعمل كده ليه؟وازاى اتغير كده.. ؟

طبعا لازم يتغير ولازم مايبقاش طايق البيت من بعد طرقك المنمقة فى تطفيشه من البيت.. وماتقوليش هى فى واحدة بتطفش جوزها من البيت.. أيوة بطفشيه من عمايلك اللى مش واخدة بالك منها واللى بتعمليها على أساس إنها واجب يومى وروتين لازم تمشى عليه.. بتطفشيه من تصرفات غبية بتصرى انك تعمليها معاه حتى لو بيضايق منها.. بتطفشيه بكلام زى الدبش وتكشيرة معتبرة وعدم الثقة فيه وفى الآخر تقولى أنا طيبة!.. عايزة تعرفى جوزك اتغير ليه وبيطفش من البيت ليه.. تعالى شوفى الأسباب دى اللى هاتلاقى نفسك بتعمليها معاه حتى لو مش واخدة بالك منها :

الخنقة الزوجية

واحدة من أسباب تطفيش جوزك من البيت إنك خانقة عليه على طول مش عايزاه يروح ولا يجى إلا بيكى طول النهار تكلميه حتى لو فى الشغل ولو قعد مع أصحابه بالليل لازم برضه كل شوية تتصلى بيه.. مايسافرش من غيرك مايخرجش غير معاكى.. ادى فرصة لجوزك انه يبعد شوية عشان يحس انه مشتاق وملهوف عليكى مش حاسس طول الوقت انه زى العصفور اللى محبوس فى قفص غش الزوجيه اللى أول ماتجيله فرصه أكيد وبدون تردد هايطفش ويسبلك البيت بحاله.


الإستهبال الزوجى

الواحدة مننا بتنشن صح٫. عارفة ان جوزها دلوقتى فى الشغل وغرقان فى مهامه وتلاقيها تكلمه ستين مرة ويكنسل عليها لكن ماشاء الله عندها اصرار وعزيمة لحد مايرد عليها واول مايرد تقطمه شوية انه ماردش عليها على طول وبعدين تنزل عليه بسيل من الطلبات واحتياجات البيت.. عايزين كذا.. وكذا ولبن البنت خلص وكمان البامبرز ماتنسهوش. وماما جايه على الغدا محتاجين محتاجين حاجات . لحد مايطهق فى عيشته ويسبلك الدنيا كلها ومايرجعش على الغدا أصلا٫

 

الأخبار الوحشة

لازم يبقى فيه فقرة يومية ثابته على الغدا.. الست الناصحة ماتفوتهاش عشان تفتح نفس جوزها وهى فقرة الأخبار الوحشة والكئيبة يعنى عارف فلان الفلانى مات النهاردة.. وعلان العلانى فلس وقفل الشركة وابن الجيران ضرب ابنك بس ماتقلقش انا ماسكتلهومش اديتهوم فوق دماغهم.ومرتب الشهر خلص وهكذا لحد مانفسه تتسد ويسبلك الغذا ويقوم وتروحى مستغربة هوا بيعمل كده ليه !


فقرة الاستفزاز

طبيعى انه يحصل خناقات بين الست وجوزها لكن اللى مش طبيعى إن الست تتحول الى كائن مزعج .تانى لما بتتخانق نبرة صوتها الحادة ووشها اللى داس عليه قطر وشعرها المنكوش وعليا وعلى أعدائى.. طيب استنى لما تهدى وبعدين اتكلمى .مش لازم وانتى فى قمة عصبيتك تردى عليه وتطلعى المواهب كلها لدرجة انك تستفزيه بكلام والفاظ وحركات تخليه يسبلك البيت كله ومايرجعش وتندمى فى الآخر على عملتيه حاولى تتبعى سياسية كظم الغيظ لحد ماتهدى وترجعى للكائن الأنثوى تانى الرقيق لاسمح الله..

 

يوم العالمى للنكد

الراجل من دول بيستنى يوم أجازته بفارغ الصبر عشان يستجم ويريح أعصابه كده فى بيته وسط مراته حبيبته.. لكن الست الواعية والشاطرة هى اللى بتعرف تستغل لحظات الإستجمام مع جوزها دى ازاى وتحولها للحظات تنضيف للبيت ومسيح وغسيل وطبيخ.. وتلاقيها فاتحة الشبابيك من صباحية ربنا وتقوله أصل الشمس حلوة النهاردة فاقولت فرصة أشمس المراتب.. طيب والراجل اللى نايم.. ينام براحته هوا أنا جيت جمبه انا بس فتحت الشبابيك والبلكونات وشغلت المكنسه ونفضت المراتب ومسحت الأرض وزعفت الحيطان .فيها حاجة دى.لا ياحبيبتى ماتقلقيش مافيهاش أى حاجة. ده بس بعد كده عمره ماهيفكر يقضى يوم الأجازة معاكى تانى وابسطها هايروح يقضيه مع مامته حبيته واولعى انتى وتنضيفك بقى.. وتيجى تقولى فى الآخر هوا جوزى طفشان من البيت ليه هوا أنا عملت حاجة!

استنونا فى الجزء التانى من يوميات زوجة مستعبطة وازاى تعكننى على جوزك..

 

عزيزى الزوج.. "إزاى تحرق أعصاب مراتك"

الحب بين الأزواج.. يتعفن بالإهمال

زوجة-سلبية-ومجرد-كرسي-في-البيت">نعمزوجة-سلبية-ومجرد-كرسي-في-البيت">.. زوجة-سلبية-ومجرد-كرسي-في-البيت">أنا زوجة سلبية ومجرد كرسي في البيت

زوجة-عن-العلاقة-الحميمة-لست-مجرد-عشيقة">الزوجة عن العلاقة الحميمة : زوجة-عن-العلاقة-الحميمة-لست-مجرد-عشيقة">لست مجرد عشيقة

الرجالة ماتت فى الحرب خلاص

  • تعليقات فيسبوك
  • اعلان