رئيس التحرير: عادل صبري 10:07 مساءً | الثلاثاء 20 نوفمبر 2018 م | 11 ربيع الأول 1440 هـ | الـقـاهـره 28° صافية صافية

عيد سعيد.. "مش هادخل المطبخ فى العيد"

عيد سعيد.. مش هادخل المطبخ فى العيد

المرأة والأسرة

المطبخ والعيد

إضراب عام عن المطبخ

عيد سعيد.. "مش هادخل المطبخ فى العيد"

سمية الجوهرى 26 يوليو 2014 09:40

(ليه زي مالرجالة بتاخد أجازة من شغلها فى العيد إحنا كمان مانخدش أجازة من المطبخ.. ليه هما يحسوا بالتغيير في العيد واحنا مكتوب عليا نقف نحضر فطار وغدا وعشا وتسالى ولا كأن فى عيد..عشان كده أنا قررت أنا كمان آخد أجازة من المطبخ ومش هادخله فى العيد ويبقى عيد سعيد عليه وعليا ) هكذا قررت صديقتي أن تتمرد على المطبخ فى العيد وتعلن إضراب عام وتدعو فيه بقية صديقتها وقريباتها أن يشاركن في هذا الإضراب..

ومع إني اقتنعت بوجهة نظرها وأن من حق الزوجة أن تستمتع بإجازتها مثلها مثل الرجل.. إلا أنني أعرف أن هذا الإضراب سيعلن عن فشله بعد أول يوم من تنفيذه..

 

                                                                                                              أسباب فشل الإضراب

1- لأن جوزك لو عزمك مرة على الغدا بره هايجى اليوم التانى ويقولك معنديش مشكلة اطلبى دليفرى وحاسبى من مصروف البيت وهاتيجى تلاقى أن مصروف البيت خلص على الأكل الجاهز واحنا لسه فى أول الشهر.

2- أو هايبيعك ويخرج يتغدى مع صحابه وتقعدى إنتى تضربى راسك فى الحيط وتضطرى تقومى تحضرى لنفسك أكل
3- والحاجة التانية هاتلاقى بعد أول يوم المواعين اتكركبت فى الحوض وتنضيف المطبخ اللى قعدتى سنين تحلمى بيه كله راح لأن ايدك مش فى المطبخ على طول وهاتضطرى فى نهاية اليوم إنك تدخلى تشطبى المطبخ غصب عنك وتنهى الإضراب بمزاجك.
4- وبالنسبة لأهم حاجة وهما أولادك اللى ممكن جدا تلاقى إبنك الصغير داخل يقولك"ماما ماما هوا إنتى مبقتيش تحبينا ولا إيه ؟هاتقوليله ليه ياحبيبى بتقول كده..لإنك ماعملتيش أكل لينا ياماما وسيبانا جاعنين!

 

                                                                                                بدائل أخرى

ولأن كده كده الموضوع ده خسران والفكرة دى إنتى اللى هاتطلعى غلطانه بسببها فى الآخر.فممكن توفقى بين الإتنين إنك تدخلى المطبخ بوقت قليل وفى نفس الوقت تستمتعى بآجازتك. عن طريق

1- لو إنتى تابعتبى سلسلىة "تنضيفة العيد "ومشيتى معنا فى أيام التنضيف يعنى مفروض هاتكونى خلصتى تنضيف الشقة إمبارح وهايبقى فاضلك يومين على العيد ممكن تحضرى فيهم الأكل وتحفظيه فى الفريزر
2- اعملى آكلات سهلة وسريعة وحضريها من دلوقتى
3- عصجى كمية مناسبة من اللحمة المفرومة للعيد وسيبيها تبرد وشيليها فى الفريزر وطلعيها فى أى وقت واعملى بيها صينية جلاش سريعة باللحمة المفرومة مش هاتاخد منك ربع ساعة
4- تبلى البانيه وقسميه على كذا علبة وشيليه فى الفريزر وطلعيه ساعة ماتحتاجيه على التحمير على طول
5-  اعملى تسبيكة وسيبيها تبرد وشيليها فى الفريزر وطلعيها اعملى بيها أى أكلة إنتى عايزاها أو إعملى بيها أى نوع مكرونة بتحبه أٍرتك بجانب البانيه او اللحمة المفرومة
6- اسلقى لحمة وسيبيها جاهزة وطلعيها فى العيد حمريها بفحمة او حطيها تحت الشواية على طول وفى أى وقت
7- قسمى الفراخ ل8 قطع وتبيلها وشيليها فى الفريزر
8- خرطى ملوخية وقسميها على أكياس وطلعيها على طول فى 5 ق تعملى طبق ملوخية على الغدا فى العيد
9- اعملى الكيك اللى ولادك بيحبوه وحطيه فى الفريزر وهوا سخن وطلعيه قبلها ب 5 ق يفك وهايبقى زى الطازة بالظبط ويبقى كده ماوقفتيش فى المطبخ مدة تحضرى كيكة وحلويات
10 بكده وبوصفات تانية حضرى اكلات العيد واحفظيها فى الفريزر وطلعيها على الخطوات النهائية بس وبكده هاتكونى ضربتى عصفورين بحجر حضرتى أحلى الأكلات واستمتعتى بوقتك فى حاجات تانيه بدل تقضيته طول اليوم فى المطبخ

                 اقرأ أيضًا:

 

  • تعليقات فيسبوك
  • اعلان