رئيس التحرير: عادل صبري 11:11 صباحاً | السبت 22 سبتمبر 2018 م | 11 محرم 1440 هـ | الـقـاهـره 34° صافية صافية

أكل الفنادق بيترمى والناس مش لاقية تاكل

أكل الفنادق بيترمى والناس مش لاقية تاكل

المرأة والأسرة

بوفيه مفتوح بفندق

يوميات زوجة..

أكل الفنادق بيترمى والناس مش لاقية تاكل

سمية الجوهرى 26 أبريل 2014 06:09

 

بحمد ربنا إنى كأى زوجة مصرية أصيلة فيها خصلة الزن..فاتقريبا كل المصريات عندهم الخصلة دى..انها تفضل تزن على جوزها لحد مايحقق مطالبها..فاستغليت العادة المفيدة دى فى الحقيقة.

قعدت أزن على جوزى عشان نروح نصيف فى شم النسيم..ماهو بصراحة مش هانلاقى اجازة طويلة زى دى دلوقتى. شم النسيم وعيد تحرير سيناء وجمعة وسبت أجازة كمان. وخصوصا ان الامتحانات هاتهل خلاص وبعدها شهر رمضان الكريم ولسه بقى على العيد يحلها ربنا

فصممت اننا نستغل الوقت ده ونغير جو ونصيف...وهوا برضه كأى زوج مصرى أصيل مابيحبش يقول لمراته حاضر على طول (لأنها عيبة فى حقه يقول حاضر لمراته كده بالساهل ) فقعد يماطل شوية.لحد ما جيه فجأة وقالى حضرى شنطتك ياروحى هانروح شرم الشيخ ..قلتله شرم ..يعنى سيناء..يعنى أمن غير مستقر..يعنى عمليات ارهابية..لا ياسيدى انا مش لعبة اللعبة دى..

                            اللى مكتوب لنا هانشوفه

يعنى ايه مش هاتروحى ؟ انا حجزت خلاص اسبوع فى فندق هناك..وبعدين مش انتى اللى قعدتى تزنى عشان تروحى تصيفى..قلتله انت بتحرٌمنى يعنى عشان مازنش عليك تانى وتودينى فى حته نموت فيها..ياستى اللى مكتوبلنا هانشوفه وماتخفيش من حاجة.

                               غداء المطعم

وبعد مشوار طويل وكمائن وتفتيشات على الطريق كأننا هانعدى الحدود وصلنا شرم الحمد لله بالسلامة وروحنا على الفندق..ولأن كان معاد الغداء فى الفندق واحنا جاعنيين اووووى .حطينا الشنط وسريعا على مطعم الفندق

                                جميع أنواع الأكل

ياسلاااااااام..اكل أشكال والوان..(كل ماتشتهيه موجود ) لدرجة انك بتبقى محتار تاكل ايه ولا ايه..ولأننا كمصريين عندنا مبدأ الإستخسار..فاتلاقينا بنملى طبقنا على الآخر من كل حاجة حتى لو مش بنحبها ومش هنكلها..المهم اننا نكوش على كل اللى موجود.

ولو جيت تقارن بين طبق الأجنبى وطبق المصرى ممكن تتصدم....الاجنبى بياخد اللى بيحتاجه بس.. ان شالله تكون شوية سلطة..لكن المصرى بياخد كل حاجة عايزها او مش عايزاها والحاجة الوحيدة اللى ممكن يسبها هى السلطة .

                                    الأكل بيترمى

وعامة مش ده المهم..هما هناك بيتعاملوا ان كل واحد حر وماحداش ليه دعوة بالتانى..ماشى انا موافقة على الكلام ده..وموافقة انك تغرف اى حاجة على مزاجك بس انك تسيب نص الأكل فى الطبق ويترمى فى الزبالة وماحدش ياكله تانى..ده يبقى حرام وافترى..

                                       مش مثالية

ولأنى انا انسانة مش مثالية برضه..احيانا كنت باخد اصناف فى طبقى من باب التجربة والفضول .واكتشف فى الآخر انه صنف مش عاجبنى ..لكن كنت  بحاول انى ماحطش الشوكة فى الجزء اللى مش هاكله او اجرح القطعة اللى سيباها .يمكن حد يستفيد منها..والصدمة انى لاقيت الجرسون واخد طبقى بعد ماخلصت وبيرميه فى كيس اسمر كبير مكتوب عليه (رابش )

                                    حسيت بالذنب

زعلت اوووى وقعدت مدايقة ازاى ناس مش لاقية تاكل وهنا فى الفنادق الأكل بيترمى بالهبل وتخيل بقى اكل  ل3 وجبات فطار وغدا وعشا غير (السناكس ) اللى بين الوجبات..(وأكل فاخر كمان مش فول وطعمية مثلا)

حسيت بالذنب وقررت أنى أكلم الجرسون اللى بيجمع الأطباق كلها ويرمي البواقى فى الزبالة وقلتله انتوا ليه بترموا الأكل ده كله ؟مش حرام كمية الأكل دى تترمى وفى ناس غلابة مش لاقيه تاكل !قالى مافيش ناس غلابة هنا فى شرم..قلتله ازاى كل مكان فيه ناس غلابة فى شباب على قدهم بيجوا من كل المحافظات بيطفحوا الكوته عشان لقمة العيش..وتقولى مفيش غلابة

                        الشغلانة أصلا حرام

قالى يامدام انتى عايزة الحق .احنا الشغلانة اللى بنشتغلها دى أصلا حرام..قلتله ليه؟ قالى عشان الأكل اللى بنرميه بايدينا..وعشان الخمرا اللى بنقدمها بنفس الأيد..

وقالى انت فاكرة الأكل اللى باقى من الضيف هوا بس اللى بيترمى ..ده حتى الأكل اللى بيتبقى فى المطبخ بيرموه كمان..قلتله ازاااااى واحنا فى ازمة اقتصادية والاسعار عمالة تغلى وناس مش لاقية تاكل...

                                 حفظ سلامة الأكل

قالى احنا مجبرين عشان ده قانون فى السياحة اسمه ( حفظ سلامة الأكل ) حفاظا ان محدش ياكل اكل باظ او حمض..قلتله آمال فين قانون حقظ سلامة الفقير اللى بيدور على الأكل فى الزبالة.

يعنى ياكلوا من الزبالة مافيهاش مش مشكلة..لكن ياكلوا اكل فاضل ونضيف يبقى فيها مشكلة..يعنى مش هايموتوا من أكل الزبالة وهايموتوا من أكل الفنادق الخمس نجوم !!فاضحك نص ضحكة وقالى بعدها ( ماجتش على دى يعنى اللى هاندقق عليها ) وعجبى.

  • تعليقات فيسبوك
  • اعلان