رئيس التحرير: عادل صبري 06:31 صباحاً | الأربعاء 19 ديسمبر 2018 م | 10 ربيع الثاني 1440 هـ | الـقـاهـره 21° غائم جزئياً غائم جزئياً

كيف تكتشفين شخصية خطيبك وتتعاملين مع عيوبها؟

كيف تكتشفين شخصية خطيبك وتتعاملين مع عيوبها؟

المرأة والأسرة

اكتشفي شخصية خطيبك

كيف تكتشفين شخصية خطيبك وتتعاملين مع عيوبها؟

رفيدة الصفتي 08 أكتوبر 2016 15:30

ليكون الزواج ناجحا يجب أن تكون بدايته موفقة، فيجب في الخطوبة" target="_blank">فترة الخطوبة اكتشاف شخصية خطيبك، ومعرفة كيفية التعامل معها، ومعرفة عيوبها، وهل بإمكانك التعامل معها مستقبل أم لا، بالإضافة إلى ذلك يجب السؤال جيدا عن خطيبك في بيئة عمله، وفي محيط سكنه، ومعرفة الخطيب لا تكون بين يوم وليلة، بل تحتاج إلى فترة من أجل الاستكشاف.

 

وقالت الدكتورة دعاء راجح الاستشارية الاجتماعية والأسرية: "معرفة الخطيب بتيجي بطرق كتيرة؛ طرق مباشرة عن طريق كلامه هو عن نفسه، وطرق مش مباشرة والي للأسف الأهالي دلوقت بتتجاهلها وهو السؤال عنه وعن أسرته في المكان الي ساكنين فيه، في مقر شغله، من أصحابه وأهله ومعارفه".

 

وأضافت عبر صفحتها على فيسبوك : "والمهم يكون السؤال بشكل غير مباشر، يعني الي رايح يسأل مايقولش دا متقدم لبنتي، لو فيه حاجة مش مرتاحة ليها استشيرى حد كبير عاقل ..الكبار في السن بيبقوا غالبا عندهم خبرة أكتر بالناس، يعني رأي بابا ومامتك خديه بعين الاعتبار.. رأي أخواتك الصبيان بيبقوا شايفين حاجات أنتي مش شايفاها، إلا لو عايزينك تتجوزي والسلام ومصغرين كل حاجة".

 

وتابعت راجح: "أما حكاية أنك هتقدري تتعايشي مع العيب دا ولا لأ، دا فعلا مش بتقدري تحدديه لأنه بيعتمد على طبيعتك الشخصية الي أنتي ممكن تكوني مش واخدة بالك منها، وعلى حجم الأضرار بيكي ودا الي بيبقى برده مش واضح، وقدرتك على التكيف و التعايش بتعتمد على قدرتك أنت شخصيا على تقبل المختلفين عنك من أصحابك وأهلك".

 

واستطردت الاستشارية الأسرية: "وكلما زادت قدرتك على احترام الآخرين مهما كان اختلافهم عنك، بيزيد قدرتك على تقبل عيوب جوزك"، لافتة إلى أن "الإنسان الي كل تفكيره في الناس انتقادات لتصرفاتهم، وكل كلامه توجيهات وتعليمات، وكل تصرفاته محاولة لإصلاح أخطاءهم؛ دا بيبقى إنسان صعب جدا يتكيف مع شريك حياته، وهيفضل طول عمره بيناهد معاه علشان يتصلح ويتحسن، ودا هيعمل له مشاكل كتيرة في حياته".

 

وأوضحت: "يعني أنتي شايفة مثلا خطيبك يفتقد اللياقة في كلامه وبيرمي طوب، أنتي ممكن تتخيلي أن دي حاجة بسيطة يسهل التعايش معها، وتكتشفي بعد كده أن دي حاجة لا تطاق بعد الجواز، وممكن تتعمل كمان أمام أهله أو أصحابه، أو تشوفي أنه بار جدا بوالدته علشان كده بيسمع كلامها قبل الزواج، لكن تكتشفي أن الأمر مستمر بعد الزواج لدرجة أنه بيسمح لها تتدخل في حياتكم أوى، أنت ممكن تلاقي أنه بيتنطط من شغلانة لشغلانة دي حاجة كويسة، و أنه بيكافح علشان يتجوز بس عدم ثبات شغله دا يدل على أنه مش صبور ومش بيطور نفسه في حاجة واحدة علشان يتحسن ويتقنها".

 

وعن الحل أشارت راجح إلى: "المهم فعلا عيوب كتير ما بنبقاش عارفين نتايجها وتبعاتها بعد كده في حياتنا الزوجية، والحل الي أنا شايفاه في القراية.. القراءة عن زوجات بتعاني من نفس العيب ونعرف هي قدرت تتكيف إزاى مع الموضوع دا، والأقوى القراءة النفسية عن العيب نفسه وأسبابه، وإزاي على المدى البعيد ممكن نتعامل معاه ونعالجه بدون ما تحسسيه أنك عايزه تغيريه وتعدليه وتصلحيه".

 

وتابعت الاستشارية الأسرية: "أنك تتكلمي معاه في الموضوع مش بصيغة الاتهام وأنه لازم يتغير، ولكن بصيغة هل هو شايف نفسه ولا لأ حاسس بأنه غلط ولا لأ، هو قناعة شخصية أنه كدة صح ولا هو عارف أنه غلط ونفسه يتصلح وأنتي تساعديه، يعني هل هو واعي لنفسه ولا دايما حاسس أنه كامل الأوصاف وماحصلش.. افتحي معاه موضوع وشوفي بس رأيه، ما تحاوليش تقنعيه أنه غلط، شوفي بس مخه فيه إيه".

 

اقرأ أيضا:

  • تعليقات فيسبوك
  • اعلان