رئيس التحرير: عادل صبري 10:25 مساءً | الثلاثاء 14 أغسطس 2018 م | 02 ذو الحجة 1439 هـ | الـقـاهـره 37° صافية صافية

أحمد ماهر: "مش معقول أتسجن 3 سنين لأني سلمت نفسي"

أحمد ماهر: مش معقول أتسجن 3 سنين لأني سلمت نفسي

الحياة السياسية

أحمد ماهر فى السجن

أحمد ماهر: "مش معقول أتسجن 3 سنين لأني سلمت نفسي"

محمد سيد 07 يناير 2014 18:32

نشرت حركة "6 إبريل" عبر صفحتها الرسمية على الـ "فيس بوك" رسالة جديدة لمؤسس الحركة أحمد ماهر من داخل محبسه.

 

وتضمنت الرسالة ندم أحمد ماهر على تسليم نفسه بناءً على اقتناعه بنصائح البعض أن تسليمه لنفسه سيوقع عليه غرامة كحد أقصى ولم يتوقع أن يصل الأمر للسجن ثلاثة سنوات، متوعدًا بسخرية من نصحوه بالانتقام منهم عقب خروجه من السجن.

 

وشدد ماهر على أن السجن جزء من النضال الثوري وأن الله سوف ينصر المظلومين، متسائلًا عن دور المنظمات الحقوقية، والأحزاب الثورية وبعض المسؤولين الذين انضموا للحكومة على أنهم ثوار مثل مصطفى حجازي وغيره.

 

 

وجاءت نص الرسالة كالتالي:

 


أحمد ماهر يكتب من طرة

"لبست 3 سنين يا حلاوة"

"لبست 3 سنين سجن، أكيد كان احتمال مستبعد ضمن احتمالات وخواطر مروا على دماغ الواحد، أصل مش معقول ألبس 3 سنين علشان سلمت نفسي وخضعت للتحقيق !



وفي هذه المناسبة العظيمة أحب أقول لكل من نصحني إني أسلم نفسي بعد أمر الضبط والإحضار إنه هيشوف مني أيام سودة لما أخرج، دا لما أخرج يعني.

كله قعد يقول ما تقلقش حتى لو طبقوا قانون التظاهر عليك آخرها غرامة مش حبس، قانون التظاهر بيعاقب المحرض بالغرامة فقط، ماشي يا عم أديني سلمت نفسي ولبست 3 سنين، حلو كدا !!.



عمومًا مفيش داعي للكلام ده، ومش مفيد، واللي حصل حصل ورب ضارة نافعة، وربنا هينصر المظلوم ولو بعد حين، وكمان لازم الواحد يتحمل العقوبة لأن العقوبة جزء من النضال، مش بصبر نفسي، بس أنا مقتنع بده، وحسبي الله ونعم الوكيل، وأكيد اللي نصحوني بتسليم نفسي لم يتخيلوا إن غباء النظام يوصل لكده، محدش كان يتخيل الحكم بصراحة


ما علينا، كلامي دلوقتي مش للناصحين لأني عارف إن نواياهم كانت خير، ولا هوجة كلام للفلول لأن الكلام مش هاينفع معاهم وسط مشاعر الفرحة والانتقام المسيطر عليهم دلوقتي، ولا الداخلية لأنهم مش بنى آدمين أساسًا، ولا للعسكر وأجهزتهم السيادية لأن مايهمهومش غير إمبراطورياتهم ومصالحهم ومزارعهم ومصانعهم اللي محدش يدرى بيها، كلامي دلوقتي موجه لبعض الناس اللي بعض الناس الكويسين بيقولوا إن احتمال يكون فيهم أمل أو ضميرهم يتحرك.



-إلى أعضاء المجلس القومي لحقوق الإنسان، شوفتوا حقوق الإنسان؟

 


-إلى الأحزاب اللي افتكرناها ثورية وخرجت من رحم الثورة زي الدستور والمصريين الأحرار والمصري الديمقراطي وبالذات المصري الديمقراطي وبرضة التحالف الشعبي الاشتراكي.. حلوة الدولة كدة؟.. هي دي الديمقراطية والمدنية اللي بتطالبوا بيها؟


-إلى زياد بهاء الدين وعز الدين شكري فشير وكل اللي بيلعبوا دور المحلل للنظام القمعي.. مش حاسين إنكم هاتتنفخوا قريب وأن الصمت والتنفيض مش هايحميكم؟ دي مبادئكم؟.. (تصدق إني هقطع رواية باب الخروج اللي معايا في الزنزانة.(


-إلى أستاذي مصطفى حجازي.. فاكر قبل 30 يونيو بأيام لما قولتيلي استحمل وإن التشويه والتخوين حاجة عارضة وإن المستقبل لنظام ديمقراطي سليم بعد هذه الفترة؟ طيب فاكر بعد 30 يونيو لما قولتلي إن الأخطاء كلها حاجات فردية وعابرة لكن المستقبل جميل؟

 


هو دا المستقبل الجميل؟ هي دي المبادئ اللي علمتهالنا من سنين ؟ هي دي دولة القانون اللي بشرتنا بيها؟ هي دي الكرامة؟

أنت كنت بتشتغلنا يا عم؟!



-إلى المستشار عدلي منصور.. أنا عارف إنك راجل طيب وبركة ومالكش دعوة باللي بيحصل في البلد.. ولما قابلتك في يوليو اللي فات صعبت عليا بس بذمتك ينفع اللي بيحصل ده؟.. يرضيك الكلام ده؟.. حاول تقول حاجة.. أي حاجة.. أنت راجل طيب ومش هازعل من كلامك.. بس اتكلم.
 

 

-إلى تمرد والتيار الشعبي وحمدين وكل الناصريين "لوكشة واحده".. أنا عارف انكم بتحترموا الجيش والداخلية والمخابرات وكل الأجهزة الأمنية، وعارف أنكم عايزين تكرروا تجربة عبد الناصر علشان كده أنتوا مبسوطين باللي بيحصل.. بس ماكانش ينفع نبدأ بالعدالة الاجتماعية الأول قبل القمع؟.. هو كله ضرب ضرب.. لازم ناخد من نظام عبد الناصر القمع والتعذيب وتلفيق التهم فقط؟!.. لازم نطبق سيناريو 1954 بكل حذافيره؟ مفيش تطوير؟


-إلى المخرج العبقري خالد يوسف.. برضه قولتلي قبل 30 يونيو إن التشويه والتخوين والقبضة الأمنية هو ظرف مؤقت وإن 6 إبريل لازم تستحمل التشويه المؤقت وغن المستقبل أفضل.. عاجبك اللي بيحصل ؟ هي دي الحرية والكرامة إللي قولتلي عليها؟ هو دا إنقاذ مصر؟



-إلى الأصدقاء النشطاء اللي كان ليهم علاقة بـ 25 يناير ودلوقتي مرتمين في حضن النظام القمعي العسكري.. مش خايفين؟ مفيش أي قلق أن انتقام الفلول وأمن الدولة هايطولكم قريب؟ مش مدركين أن نفاق السلطة لن يحميكم؟



-إلى الحركات الشبابية اللي مش بيطيقوا اسم 6 إبريل وأحمد ماهر والناس اللي بتجيلها حساسيه وهرش لما بيسمعوا أو يقروا عننا.

 


مبسوطين؟.. 3 سنين مع الشغل وغرامة 50 ألف ومراقبة 3 سنين مش مقلقاكم على نفسكم؟.. صفيتوا حساباتكم من 6 إبريل؟ أحمد ماهر انزاح عن طريقكم وبقى الطريق فاضي أمامكم للظهور؟ حلو كده؟ بقيتوا لوحدكم بره السجن؟


عمومًا كلها 3 سنين مع الشغل ونتقابل بره تاني، واللي مخلص منكم ومحترم رغم عقدة 6 إبريل أكيد هقابله في السجن جوه.. عمومًا "كتر خيركم" حاولوا بس تدركوا إن ترديدكم للشائعات المفبركة عن أحمد ماهر و6 إبريل هايضركم قبل ما يضرنا.. وإن تصديقكم لاتهامات التخوين هايطولكم في يوم وهاتحسوا باللي بنحس بيه، وإن العقد اللي عندكم من 6 إبريل هي اللي شقت الصف الثوري وسمحت لركوب الثورة عدة مرات، وأدينا أهو، فلول مبارك راجعين، أمن الدولة رجع، وكل حاجة رجعت لما قبل 25 يناير وأوسخ، ورجعوا ينتقموا.



ودلوقتي حبسوا أحمد ماهر وعايزين يحجموا 6 إبريل.. وهايتسلوا عليكم واحد واحد وحركة حركة ومجموعة مجموعة وقهوة قهوة
راجعوا ضميركم لو لسه موجود.



مين تاني أوجه له كلام؟.. كفاية كده.. أنا لسه واخد حكم 3 سنين ومحتاج أنام شوية، أتمنى الناس تفوق وكفاية مزايدات وتخوين وقرف.. الثورة ضاعت، والفلول وأمن الدولة راجعين ينتقموا.



وأخيرًا إلى حركة شباب 6 إبريل.. أنتوا الأمل أوعوا تتهزوا.. وإلى أبي وأمي وزوجتي وأولادي.. أنا عارف إني تعبتكم كتير وبهدلتكم كتير معايا.. وإنكم بتعانوا أكتر مني من الشتيمة والمزايدات والشائعات والكدب والتدليس.. 
معلش.. هانت.

 

  • تعليقات فيسبوك
  • اعلان