رئيس التحرير: عادل صبري 01:21 مساءً | الخميس 18 أكتوبر 2018 م | 07 صفر 1440 هـ | الـقـاهـره 28° صافية صافية

كوافير ومكياج «مضيفات مصر للطيران».. خلاف برلماني مع الوزير

كوافير ومكياج «مضيفات مصر للطيران».. خلاف برلماني مع الوزير

محمود عبد القادر 18 ديسمبر 2017 19:22

شهد اجتماع لجنة السياحة والطيران المدني بمجلس النواب، برئاسة النائبة سحر طلعت مصطفي جدلاً بين شريف فتحي، وزير الطيران المدني، والنائبة جليلة عثمان، بشأن مظهر المضيفات والمضيفين الجويين.


ووجهّت النائبة جليلة عثمان، انتقادات لاذعة، للمضيفات، بسبب سوء مظهرهن، وعدم الاهتمام بأنفسهن، كذلك المضيفين.


وقالت «عثمان»، للوزير: في مضيفات فوق الخمسين، سايبنهم شغالين ايه، يجب وضع معيار للسن.


وتابعت «لازم يهتموا بشعرهم ومكياجهم، وبعدين تيجي تسآل تاكلوا لحمة ولا فراخ، تقولها لحمة، تقولك معلش فراخ بس، طب بتسأل من الأول ليه».


ورد الوزير، قائلا «لم نقم بتعيين أي مضيفين منذ 3 سنوات، اللي بتقولي عليهم كانوا كويسين واتدهورو».


وردت النائبة "مش عيب نرفع مستوي كفاءتهم ويكون فيه ستايلست وكوافير ومكياج ".


وتابعت" الضيافة أول حاجة بنشوفها، مينفعش مضيفة يبقي حجمها كبير شوية، لو مضيف بيشرب مخدرات، بتوقفه، ولو مضيفة شكلها كده نغيرها".

 


فيما قال الوزير  «حاليا بيوقوفهم، وبلاش نعمم علي كل المضيفين، بلاش ندي صورة قاتمة، عندنا نحو 3 الاف و100». 

 


فيما وقعت  مشاداة بين  الوزير والنائبرياض عبدالستار،ففور دخول النائب قاعة الاجتماع قبل انتهائه بدقائق قليلة، وجه حديثه للوزير بعصبية: عايزين نعرف ايه اللي هيحصل للسياحة الروسية، احنا مش مغيبين"، ورد الوزير، قائلا: أنا قولت الكلام ده من بدري.

 


وانفعل النائب، قائلا: ماتقوله تاني، مينفعش تكرره؟، أنا عضو لجنة السياحة، عايز أعرف، فيما انفعل الوزير، في وجه النائب، قائلا له: كنت جيت بدري، مش كل نائب يجي متآخر، أعيد له الكلام، وقال النائب، للوزير" يعني إنت مينفعش تعيد الكلام؟"

 

 

وفي نبرة غاضبة وجه الوزير حديثه للنائب" اه ماينفعش، ماتجيش بعد الموضوع مايخلص وتقولي عيد كلامك"، فيما تدخلت رئيسة اللجنة النائب سحر مصطفى لإنهاء الموقف، مؤكدة أن هناك ميعاد معلن للجنة، وكان يجب الالتزام بالحضور.

 


وأكد وزير الطيران المدني، علي جاهزية المطارات واستعدادها لاستقبال الرحلات الروسية بدءا من فبراير المقبل، مضيفا" ياريت تنسوا موضوع أمن المطارات، مش كل شوية نتكلم عنه، احنا اللي بنعمل منه أزمة من كثرة كلامنا عنه، احنا مكناش وحشين والدنيا مكانتش سايبة و اللي بيحصل دلوقتي شئ مشرف".

 


وقاطعته النائبة سحر طلعت مصطفى رئيسة اللجنة، بالإشارة إلي اعتراض البعض بشأن خلع الأحذية أكثر من مرة بالمطارات، ورد الوزير، قائلا: التأمين يكون علي قدر التحديات،والتركيز في الأمن يكون علي حساب الإجراءات، والمواطن مش هيزعل لما يتأخر 20 دقيقة، في مقابل يكون هناك أمن، لكن هيزعل لو ملقاش أمن، و كافة الدول بتعمل كده، فيه ناس عاوزه تتعامل زي الدول الاخرى بدون فهم للواقع.

 

 

وأكد أنه سيكون هناك خارطة طريق لعودة السياحة لمدينتي الغردقة و شرم الشيخ، متابعا" أنه من السابق لأوانه تحديد نسبة معدلات الزيادة في حركة السياحة".

  • تعليقات فيسبوك
  • اعلان