رئيس التحرير: عادل صبري 02:49 صباحاً | الاثنين 19 نوفمبر 2018 م | 10 ربيع الأول 1440 هـ | الـقـاهـره 26° صافية صافية

الباعة الجائلون بشارع قصر النيل يفترشون الرصيف ويهددون بالاعتصام

الباعة الجائلون بشارع قصر النيل يفترشون الرصيف ويهددون بالاعتصام

أخبار مصر

الباعة يفترشون الرصيف بشارع قصر النيل

أحد الباعة: مبارك بجلالة قدره معملشي اللي عملوا فينا السيسي

الباعة الجائلون بشارع قصر النيل يفترشون الرصيف ويهددون بالاعتصام

نورا ناصر 24 أغسطس 2014 14:28

افترش عدد كبير من الباعة الجائلين رصيف شارع قصر النيل، اليوم الأحد، عقب قيام قوات الأمن بمصادرة عرباتهم وبضائعهم في إطار حملة تشنها قوات من الجيش والشرطة لنقلهم إلى جراج الترجمان بهدف استعادة المظهر الحضاري لشوارع منطقة وسط البلد.


 

وأكد الباعة لـ "مصر العربية" دخولهم وأسرهم في اعتصام مفتوح  على الرصيف احتجاجا على طريقة تعامل قوات الأمن معهم لإجبارهم على الانتقال إلى جراج الترجمان.


 

في هذا السياق، قال سيد همام: "أنا بقالي 40 سنة فى شارع قصر النيل، عندي 5 عيال، اللي في الجامعة واللى في ثانوي و اللى فى إعدادي، طول عمرنا واحنا ماشين بما يرضي الله فى الشارع، هما عايزين ينقلونا الترجمان، مفيش هناك أكل عيش، هنأكل عيالنا منين؟".


 

وأضاف عادل صديق: "أنا معايا 4 عيال، ودلوقتى هما مش مخلينا نفرش، اعمل ايه؟ اقعد وامد ايدى واقول لله يا محسنين؟ ولا افتح مطوة على واحد؟ احنا طول عمرنا أبًا عن جدّ هنا فى شارع قصر النيل"


 

واستكمل الحديث أحد الباعة، يدعى إبراهيم عرفان، قائلا: "احنا عايزين ناكلها بالحلال، وعلي النعمة ما هنمشي من هنا حتى لو هنموت، منطقة الترجمان ديه كلها بتوع الخردة، احنا بنقولهم يسيبونا 6 شهور بس، أويعملوا لنا كل واحد متر فى متر على الرصيف، الناس تعبانه وكل واحد عنده قرطة عيال داخلين على مدارس، و الحكومة مش عايزة تحل أصلا".


 

ووافقه فارس سمير قائلا: "أنا معايا 3 عيال والبنت لسه داخلة المدرسة دفعتلها 2000 جنيه، الواحد مش عارف يعمل ايه، هي كدا هتبقى عركة، بكره ان شاء الله هجيب عيالى واقعد على الرصيف، ووكلنى يا بيه، كل حاجة غليت، احنا حاطين جزمة فى بؤنا، عايزين ناكل عيش بالحلال لا اكتر ولا اقل".


 

وأضاف: "بنطلب من عبدالفتاح السيسي يبص لنا، احنا معانا عيال، اجيب منين؟ انا كدا همشي غلط بدل ما انا باكل من عرق جبينى، مش عايز حاجة من الدولة، انا عايز أكلها بالحلال، نمشي من الشارع ماشي، بس هاتولنا مكان يكون فيه روح".


 

وصاح أحد زملاء سمير من الباعة يدعى أحمد الصعيدي قائلا: "مبارك بجلاله قدره معملشي اللى عمله فينا السيسي، القبر اللى بنعملو للبنى آدم بيبقى مترين، هما عاملين شريط صغير بالطباشيرة، آخر النهار هناخد بضاعتنا على كتفنا ونمشي، اصلا بتوع السبتية هناك قالوا لنا اللي هييجي هنموته، هنروح نبيع لمين هناك؟ مين هيروح علشان يشترى مشط اوفرشة او شبشب او غيره؟".


 

جدير بالذكر أن أجهزة الأمن بالقاهرة بدأت في رفع الإشغالات  في شوارع وسط البلد ونقل الباعة الجائلين إلى جراج الترجمان لاستعادة الرونق الحضاري للشارع.


 


 

 

 

اقرأ أيضا:

  • تعليقات فيسبوك
  • اعلان